庚寅年12生肖 - 運桔運程

好快就到-庚寅-虎年,如果時代冇變,時間冇變,喺2010年2月4日立春後就正式踏入虎年, 大會請咗連乜嘢叫做羅更都唔識,但係猛咁吹話自己係再世潘安既 -曾獻子-出嚟同大家九UP虎年12生肖到底會點運桔法!

首先當然係主角 - 老虎仔,老虎女 -睇吓你地今年點運桔先...

肖虎既人會見到朝早有太陽,夜晚有月亮既關係,所以日頭會覺得好光,夜晚冇街燈或者熄咗燈就會覺得好黑,好光既時候記得戴黑超,冇黑超係身,就咪實對眼,如果仆街既話,係應劫..好黑既時候就要瞓覺,就算行行街突然好黑都好,記住都要瞓,同樣咁就會應咗[瞓街]呢一個劫

兔年既朋友又係點呀?

屬兔既人,其中會有人有感冒,要住醫院,有人好番會出院,有人會失業,有人會發財,有人打麻雀會贏亦有人會輸,有人結婚有人離婚,仲有人會生仔生女...

而家到龍年既朋友

龍年既朋友,恭喜哂,今年如果你唔死既話,要繼續捱!!未結婚既肖龍人有結婚既機會,未拍拖既仍然係單身,如果係男性又中意去搵一樓一,切記要戴避孕套!

蛇年又點呀!

肖蛇既朋友,如果你開通宵或者玩通宵,失眠既話,跟住嚟就會好攰好眼瞓,呢一點係需要注意既

馬會特約 - 肖馬運桔賀虎年

馬會為咗慶祝開業百九幾年,所以凡係肖馬既人去馬會投注站,都係免費. 如果有細路仔同行,可以將佢縛係馬會門口既[栓馬樁]度,都係免費既,如果搵唔到[栓馬樁],都可以擺啲細路仔係馬會門口當Display, 呢樣都係免費

小肥羊呈獻 - 羊牯唔,你就呻笨 -廣告雜誌

玄學界話 -  十隻羊咩九隻騷- 因為有隻死很咗好耐,摳到臭哂丫嘛! 肖羊 天生羊牯命繼續令你地大受歡迎,而且繼續係係大耳窿,祈福黨排行榜第一既至愛! 如果想唔做羊牯,去種生基啦!  將你自己成份甕落個窿度嗰隻,掂哪!又或者,將自己賣俾小肥羊,至少都有兩張9折優惠券攞返,益吓屋企人

肖猴運程呢?

肖猴...唉,一個字,驚!買咗樓既人就好驚自己層樓升唔到七萬幾一呎,未買樓諗住買既人又驚買咗之後會唔會跌破七百幾一呎,最驚既都係住喺天橋底既肖猴人,政府派慳電膽券,到時買咗個膽都唔知攞去邊度用!你話驚唔驚!

雞年點運桔

肖雞既朋友,恭喜哂,特別係一樓一既肖雞女士們,因為大家喺虎年仍然可以繼續營業.,持雙程證既肖雞女士,廟街,上海街,佐敦一帶仍然係你地既張床,不過中意著住肚兜同底衭兜客既肖雞女士就要留意,個樣靚至好,如果唔係就會有礙市容,攪到食環署俾人投訴就唔係咁好!

肖狗好唔好運呀?

肖狗係虎年最好運既,因為肖狗咁...呢...咁囉...咁嗯...咪就係咁囉...哪!經過我算過之後...咁盛呢...俾個號碼你,就係 9 號,所以話 9 係好好運既!

太慶燒肉誠意推介 - 豬年運程又點睇

好榮幸能夠成為太慶燒肉既代言豬,如果中意食燒肉既朋友,記得燒肉皮一定要脆,買既時候仲指定[沙梨篤],唔要搭豬骨...今日賣唔晒,聽日再買都得,今年賣唔哂,出年一斤加多粒桔,所謂煎我層皮,拆我既骨,食你唔死,咁就過骨,神枱老鼠吔過都話 - 嘩匿骨!

肖鼠虎年有幾威

肖鼠朋友今年財運係打緊工既繼續有糧出,冇工打既朋友就茂糧出.橫財唔錯噃,好似買股票買到升嗰隻,咁你就會賺大錢! 至於買六合彩,馬仔,除咗記住要去投注站買,電話都得既,如果想發達,俾個秘訣你哋,呢吓好緊要,你想發達一定要記住我既方法,就係買Number ! 只要買啱Number,中咗既話,想唔發都幾難!

麥記招材特約  - 肖牛最佳創業推介

牛年既人今年驛馬星動,有好大機會去到-冰島-呢個國家創業,而且仲有去冇回,慳返回程機票,因為麥記會重開快餐店,需要好多廉價牛牛幫佢地打江山,職位都唔錯,係公司中層,而身價暴升...上司係漢堡包面,下屬係漢堡包底...成廿幾三十歐羅身價一個包,你地就威啦!