皓碖初到迪迪尼(相後補)

十一月, 係皓碖爸嘅生日月份, 所以活動特別多. 繼先兩日去灣仔 camp 之後, 呢兩日 (10 - 11/11) 我地又去咗迪迪尼, 今次係住迪士尼酒店~

天公造美, 明明天氣報告話呢兩日會陰天兼落雨, 最後係兩日都風和日麗.

10/11
我地十點半左右出發. 其實我地屋企樓下係有巴士直到樂園嘅, 不過我地覺得皓碖第一次去, 梗係要搭吓迪迪尼嘅列車啦~於是都係揀咗搭港鐵.

首先我地去酒店 check-in, 不過房間未準備好, 所以放低行李我地就入樂園嘞. 離開酒店前見到灰姑娘, 皓碖對佢無乜興趣, 一味轉身要落地自己走去玩.

平日嘅迪士尼真係少人得陰公. 皓碖入到樂園有咁多地方比佢蕩嚟蕩去梗係開心, 我地亦樂得清閒, 唔駛吓吓抱住佢. 我地同皓碖玩咗咖啡杯, 巴斯光年, 小熊維尼, 蒸氣火車, 又睇咗巡遊同米奇金獎音樂劇, 同周圍影相. 好多時間都係等皓碖自己行吓, 等佢多啲郁動. 就係因為皓碖掛住玩, 又唔食, 又唔瞓, 就出現咗以下呢一幕:



喺小鎮大街行店鋪, 都係衰咗喺啲好靚嘅罐手上, 又無無謂謂買咗幾個. 可能全日都比較曬, 皓碖瞓完晏晝嗰覺喺放煙花嘅時候, 本來睇得好開心, 睇睇吓我地發覺皓碖無晒聲嘅, 原來已經又瞓著咗. 咁爸爸媽媽就可以安心食呢餐晚飯~

食完飯之際, 皓碖就醒嘞. 我地返酒店攞房, 酒店已經為我地準備好啲 bb 用品: 沖涼盤, 奶煲, bb 牀. 我仲一心諗住呢啲用品都會係 disney theme, 但原來係無嘅....hahahah

我地 check-in 時見到酒店嘅節目表有安睡故事時間, 咁我地就同皓碖去咗 playroom 度聽故仔....嗯...個哥哥講故仔一啲都唔好聽, 佢講得好"行"呀, 我地聽咗五分鐘就走 lu

11/11
今日係爸爸生日呀, 皓碖梗係要大大啖咁鍚爸爸啦~

琴日我地玩咗幻想世界同明日世界, 今日準備同皓碖先喺酒店玩吓, 到 check-out 先返樂園玩埋個探險世界.

琴晚聽故事嘅 playroom 大部份玩具都係木造嘅, 媽媽好鍾意, 場景係廚房同小食店. 有個大啲嘅洋人小朋友喺度扮整魚扒賣, 咁皓碖又走埋去搞搞震, 走去嗡一大堆 bb 話, 個小朋友就同佢講一大堆英文教佢唧茄汁同叫佢比錢, 皓碖又係一大堆 bb 話, 好好笑, 好似真係對話咁!!

出番酒店 lobby 就見到 snow white. 爸爸話呢個白雪公主化妝化到似巫婆, 皓碖仲喊咗一陣. 後來係啲哥哥比貼紙佢先收聲.

之後過埋去 Hollywood Hotel. 原來呢邊個草地大過 Disneyland Hotel 嗰邊好多, 仲有個小型兒童遊樂設施. 不過酒店入面就似商場多啲.

check-out 完返入槳園嘅探險世界. 呢頭o岩o岩玩完森林河流之旅, 都未上樹屋, 近水嘅設施就停晒, 仲話要整一兩個鐘. 我地唯有又無聊行 shop. 本來諗住去埋迪欣湖, 點知皓碖又爆屎. 搞搞吓個天都開始黑, 最後都無去迪欣湖 lu.

因為今日係爸爸生日, 我地無逗留太耐, 等爸爸可以返阿娘屋企同佢地食飯, 順便探吓剛出世嘅表弟仔呢~