菇時離開咗我地

十月十四日星期三晚上九點十三分我個女離開咗我地

事情發生得太突然, 星期三中午我約咗媽咪出去飲茶, 然後幫菇時買頸滴, 我當時仲有問媽咪菇時有冇食嘢同食藥, 媽咪話佢食糧食咗一半, 三粒藥就有兩粒唔肯食, 不過精神唔錯, 因為係中秋節前一日, 我地帶菇時去睇皮膚(酵母菌), 醫生就幫菇時撿查時, 除咗酵母菌, 仲發現係肚腩近乳房位置有一粒凹凹凸凸嘅脂肪, 醫生話要抽細胞睇睇, 我當時已問咗醫生好多好多次有冇危險, 因為我怕抽細胞時令細胞抽散咗, 但醫生話唔會,  最後報告出咗係脂肪, 然後醫生開咗三個星期抗生素同兩個星期皮膚藥比佢, 返到屋企食第一次藥之後, 隔咗個幾鐘菇時就嘔, 之後我打返診所問, 可能菇時係空肚食藥所以嘔, 之後個幾日食藥都冇事, 不過胃口差咗少少, 食到第七日藥, 可能菇時冇乜胃口食唔夠嘢再食藥, 然後又嘔, 我打返診所要求停藥同覆診, 因為我覺得菇時食咗藥精神差咗同冇胃口, 同埋個肚肚粒脂肪大咗好多(由石仔咁細變咗雞蛋仔), 到第二日早上帶咗菇時去睇另一位醫生, 醫生就話唔好食抗生素, 轉另一隻酵母菌藥食三個星期同一個星期皮膚藥, 之後再摸菇時個肚肚, 醫生話係乳腺瘤, 仲問我菇時幾多歲做絕育, 我話十歲, 醫生就話最好係三歲或之前做, 咁樣就可以減低有乳腺瘤嘅機會, 之後又同我講話要做手術, 但我當時真係好嬲, 我問點解之前個位醫生只係話脂肪, 最後醫生當然係逃避問題, 只係答脂肪係凹凹凸凸, 我真係嬲到不得了, 我當時係想第二日返診所搵返第一位醫生問佢點解咁冇醫德, 點解當時唔清楚同我講係脂肪瘤, 一咪叫我抽出嚟睇, 如果我聽到有個瘤字, 我一定唔會比佢抽嚟驗, 抽完之後一路都係紅紅腫腫, 然後變大咗, 我真係好唔開心, 除咗依樣, 開藥我都覺有問題, 原來菇時今次食嘅藥, 係同上一次睇皮膚嘅一樣, 醫生仲話上一次都係食依d, 都冇問題, 我心諗都有一年前嘅事, 就算冇一年都大半年啦.. 乜原來睇症開藥係唔使用腦用心架, 完全唔使睇下佢地嘅身體情況再決定, 照抄返以前藥單配比寵物用, 唉...我真係嬲到爆

菇時返到屋企開始食新藥, 見佢都冇唔舒服, 精神都唔錯, 前幾日即星期一, 二我仲帶咗菇時去公園行下, 可能天氣熱, 佢行得好少, 多數都係座寵物車, 但到晚上媽咪帶佢落街行, 佢又肯行啵, 可能冇咁熱卦, 到星期三, 媽咪五點半返到屋企, 當時菇時仲會係床仔行出嚟搵我媽咪, 之後媽咪比咗少少麵包比佢食, 到六點半, 媽咪帶菇時落街, 準備將菇時抱落寵物車到, 一抱起, 菇時緊張"young "腳, 之後賴尿, 個頭打側咗, 全身軟哂, 媽咪好驚即刻送菇時去診所, 我接到電話, 馬上趕去診所, 我係途中一路都唔敢打比媽咪問情況, 到咗診所後, 媽咪話醫生同佢講, 菇時腦缺氧, 我之後入去睇菇時再問醫生, 醫生又話未知咩事, 佢話菇時嚟到嘅時候, 兩個眼球係到轉, 條脷變咗紫色, 氣速, 個頭打側咗, 不過依家聞緊氧氣同打咗鎮定劑好好多, 條脷變返粉紅色, 驗血報告指菇時個白血球好高, 醫生講咗好多個情況, 眼球轉係神經線可能同個腦有關, 氣速係喉嚨可能有瘤, 個頭側咗可能係長期耳仔發炎, 之後另一位醫生問我依幾日佢有冇咳同流鼻水, 有冇冷親佢, 驚係肺炎, 我答佢冇, 之後醫生話體重冇下降, 又唔似同肺癌, 乳腺瘤有關, 不過當時白血球好高, 又話唔知會唔會係隱性心臟病, 然後我再問醫生依家可以點做, 醫生話一路聞氧, 等佢冷靜d再去照腦同肺, 因為佢依家仲係好緊張, 如果一"旭"佢, 佢掙扎就可能會即刻唔係到, 不過診所冇24小時, 菇時又要瞓氧氣箱, 所以醫生建議我地去24小時診所, 其實當時我好想問醫生菇時係咪唔會好返架...就算好咗係咪都要聞住氧氣...如果醫生答係, 我會考慮攞開氧氣, 等佢慢慢自己走, 不過我諗咗好耐到最後都唔敢開口問依個問題, 仲決定帶佢去24小時診所, 我地比菇時聞多一個鐘頭氧氣, 大約九點就由上水飛車去到旺角只係二十分鐘車程, 但可惜開車十分鐘到菇時已經離開咗, 我由上車見到佢抬起頭掙扎過幾下, 眼球凸出反半白, 到冷靜, 我全程點住佢個背部, 聽住佢嘅呼吸聲, 由抬起頭急速呼吸聲, 開始變得低下頭微弱呼吸聲, 然後慢慢靜落嚟, 我一路都唔敢同媽咪講佢唔得喇....過咗幾十秒後菇時最後一口氣都呼埋出嚟, 我先敢同媽咪講佢唔得喇,,,,,媽咪馬上摸佢心臟, 佢話仲有跳, 我只係對媽咪令令頭作回應, 到達旺角, 我先同男友講菇時好似唔得, 男友馬上抱住菇時去診所, 醫生聽佢心臟, 不停令頭, 我見到後控制唔到情緒, 放聲喊咗出嚟, 之後冷靜落嚟, 搵咗善終公司接走菇時

雖然菇時走得好突然, 但我今次嘅心情比上次milk milk離開平靜好多, 因為菇時走得好舒服, 好幸福, 我好安慰...

                          我個小朋友離開嘅時候就好似平時瞓覺一樣