又要破財

上星期六陪老公去配眼鏡，我又貪得意叫老闆娘攞啲架比我試戴，哈哈....老闆娘同老公竟然異口同聲話我戴眼鏡好睇喎！比佢哋咁樣氹一氹又心郁郁想配返副！其實我好幾年前已經配過副眼鏡，嗰時驗眼已經知自己有近視(唔太深大約50度)+散光(比近視嚴重啲)！我成日都笑自己讀書時對眼不知幾精靈(書都唔睇多本就梗係無嘢啦)，反而一出嚟做嘢就有散光(因為第一份工超正，個位可以望到海景，每朝就一邊面被陽光照住做嘢，咁就賴嘢囉)！不過嗰副眼鏡我無日日戴，因為我覺得平時出街、做嘢無乜問題，只係睇啲嘢唔係咁清楚啫！到睇戲(要追字幕嗰啲)、上堂(要睇黑板)嗰時，我就會戴囉！可能唔係成日戴嘅關係，我戴親都會有啲頭暈同埋個距離感唔係好適應到！所以今次我都想驗吓眼，睇睇有無加深到！

一驗之下都唔係好嚴重啫(一邊眼有50度近視+50度散光，另一邊淨係100度散光)！老闆問我配唔配，我就心大心細！後尾決定唔配住，等老公第二日去開嗰頭幫我攞現有嗰副去check吓仲啱唔啱先再諗！

喔噢~老闆check完就話副鏡只係得近視無散光(唔怪得戴咗硬係唔多妥喇)，叫我盡快落去搞搞佢喎！不過前幾日都唔係好想專登走去整，見今晚去開嗰頭~返教會開會，就早少少落去囉！入到舖頭老細好醒目地認得我，我再試戴之前揀嗰個架，又比較吓其他款，最終決定要個半框嘅，10分鐘內碌埋card，再confirm多一次個度數就走得人囉！就係咁又駛咗$680喇！