潮！

琴晚去佐敦「商務」樓下果間「普善齋」食自助餐。香港食肆o既伙記有樣唔好，就係經常行過搵手拍你張凳，我最憎。呢度又係咁，我望下佢，係身穿黑色套裝o既女伙記，好明顯係伙記中o既高級者，見佢仲行去搵手抹落食客張椅背，好明顯係隻手污糟，週圍揩，斷估點都唔會係見張凳污糟而搵手去抹掛？

食食下一陣二手煙味，唔係下嘛！齋鋪緊係禁煙禁酒o架啦！附近幾圍檯o既客人當堂黑晒口面，四圍望下邊度可以轉檯。我問個伙記呢度有無禁煙區？我咁問係想話俾佢知，呢度有人食煙，點知佢話非吸煙區o係樓上，原來呢度係下層全層吸煙，想唔食二手煙請上樓上，o下！齋鋪可以食煙我都係第一次聽到，仲居然要唔食煙o既上樓上，要落黎拎野食。依家佛寺又好，民間宗教o既廟都好，都係唔想人點咁多香，「普善齋」竟然歡迎抽煙，直頭係善待抽煙人仕，我都戥煙民高興，不過以後都唔使旨意我會幫趁，建議佢改名「普煙齋」，D齋老鹵味就加多個「你」字，相信會煙火鼎盛，生意旺到做唔切。真係齋你鹵味。