獻給長老之：獨步廣州第一天「三」

我跟住想去o既地方係非常出名但我從未到過o既「沙面」，沙面位於珠江白鵝潭北岸，一八五七年，因「阿羅號事件」，英法聯軍攻入廣州，佔領三年，當時兩廣總督葉名琛掛住扶乩同念呂祖經，義和團都積極過佢好多，最終被英國佬擄走，仲自稱「海上蘇武」。到一八六一年清政府被逼將沙面劃為英法租界，租期九十九年。沙面有近百座西洋建築物，令人一時間仿如置身於一百年前o既中環，呢度D舊建築多過靚過澳門「議事亭」，如果肯落本整理一下，可以成為旅遊勝地，白天鵝賓館都係開o係呢度。呢度D舊屋有部份變成食肆或商鋪，不過無乜遊客。可惜天開始暗，又落雨，無晒氣氛，決定要搵日再黎過。

講廣州唔可以唔講食，所謂「食在廣州」，唔單止指「食」，仲包括文化風俗方面，例如見面問人「食左飯未？」，或者對心儀o既人講「我食硬你o架喇」，稍為含蓄o既講法「我灼硬你o架喇」，「灼」又係粵菜烹調o既一種方法，就算鬧人「食屎啦！」「食蕉啦！」周潤發鬧人「食雞鮑翅啦！」又係食。李博士成日講o既「人有良心，狗唔食屎」，話人表裏不一叫「鱷魚頭，老襯底」，老襯又叫「水魚」，都係同食有關。革職叫做「炒魷魚」，降職叫「燉東菇」，失業叫「食榖種」，待業叫「食西北風」，成績得零分叫做「荷包蛋」，女伴叫做「菜」，妓女叫「雞」，嫖妓叫「執劑」，男妓叫「鴨」，嫖客叫「雞蟲」，一早上嫁部叫「食早餐」，趕時間就叫「食快餐」，捉姦又叫「捉黃腳雞」，色狼叫「鹹豬手」，處女叫「燒豬」，處男叫「燒鴨」，醜女叫「豬扒」，蠢叫「豬」，勤力叫「牛」，瘦人叫「排骨」，肥人叫「肥豬」，話人做野論盡叫「雞手鴨腳」，講粗口又叫「炒蝦拆蟹」，職業又有「龜公」同「龜婆」，嬰孩叫「蝦仔」，相睇去餐廳，拍拖去餐廳，結婚要擺酒，殯儀館又叫「大餐廳」，坐監叫「食皇家飯」，無一唔係同食有關，所以話「食在廣州」係好有道理o既！

粵菜o既烹飪技術固然自成一格，而可以做菜o既食物更加包羅萬有，除雞鴨鵝，豬牛羊之外，其他如蛇蟲鼠蟻，貓狗驢兔，果子狸，穿山甲，禾花雀，馬騮猩猩，烏龜水魚，以至雞手鴨腳，五臟六腑等等都可以入菜，真係識得郁o既就食得落肚，此為粵菜第一特點。第二要生猛，就算係蛇貓狗都係即揀即，依家北方食肆D海鮮用缸養住俾人揀，都係學自廣東，此為第二特點。第三要有季節性，例如夏秋季要清淡，冬春季要香濃，冬天要食蛇羹，夏天要食冬瓜盅。第四，通街都有得食，好似北京「王府井小吃一條街」咁，都唔算係街，而係一個局，「東華門夜市」係街，但係只不過係晚黑至開o既臨時檔。而廣州就唔同，真係o係街邊，大家o係香港都成日見D街邊小食啦！而廣州唔只方便到街有得食，船都有得食。就好似香港仔o既「珍寶海鮮舫」、避風塘炒蜆同粉艇咁，我早排都仲食過粉艇D粉，真係好味道，岸上食唔到，搵日要再去試下，不過唔係成日遇到。講番廣州，以前荔灣一帶有粥艇，所賣o既就係我地依家食o既艇仔o勒！

下一站就係去食粥，坐的士去位於流花公園o既「流花粥城」食艇仔粥，只見環境一流，不過味道一般，丟！

坐地車返梅花村訓覺，呢度D地鐵有新有舊，新o既泊得住香港，非常先進。