獨步北京第六天「四」（34）加強版

出故宮，入地鐵。去火車站買火車票去天津，以為真係好多班次，點知要等到五點，去到咪六點幾！有人上黎兜搭，坐車去天津，五十蚊。為趕時間，一於落搭。湊夠四個人，一個係新潮巴辣o既豔女郎，一個中女，一個後生，個司機又成個道友仔咁，係我最似賊，所以唔驚。司機帶我地去遊花園，穿過好多條巷，至去到佢架車度，到開車都已經用左成九個字，跟住又塞下車，同坐火車無乜分別。車上三男二女，以女人最易傾得埋，素未謀面，仲要一個坐前，一個坐後，三句唔埋，就已經由護膚秘方講到有無樓？每月供幾多錢？做乜工作？

八國聯軍攻下天津後，因為去北京o既鐵路被義和團破壞，所以聯軍要行路去北京。依家去天津呢條路，會唔係八國聯軍去北京之路呢？義和團就o係呢度截擊西摩爾o既軍隊？

點解近代中國同外國打仗都係輸多贏少，點解會俾太平天國呢班神棍作亂十五年，仲打到去天津，點解太平軍會咁打得。而後來消滅太平軍要靠曾國藩o既湘軍，咁湘軍又有乜咁利害呢？曾國藩係書生一名，軍事並非其本行，佢只不過係從鄉下湖南招募鄉勇，即訓練即上戰場，而用鄉勇o既優點在於佢地「齊心相顧」，當然再加上清廷金錢上o既支持，咁就打贏太平軍。但係清兵何嘗無朝廷支持。當太平軍威脅上海時，李鴻章率領佢隊淮軍趕去上海增援，無論外觀與裝備，呢隊淮軍都足以笑死鬼佬。由此可見洋軍同清兵o既實力相差有幾遠。咁如果由洋人訓練同管理o既中國軍隊會係點呢？

最近有套記錄片講第二次世界大戰時，有中國人因為去英國格林威治皇家海軍學院留學。所以參與左襲擊德國海軍主力艦，仲參加埋諾曼第登陸。遠在第二次鴉片戰爭時，中國人都有參與圓明園文物搶掠戰。到一九零零年，亦有參與八國聯軍之戰，唔係防守戰，係攻打北京戰。

一八九八年，英國鑑粗租借威海衛，除左用印度人當防務外，仲o係當地招募中國人當兵，從照片可見，當時o既華籍英兵個個包頭，係咪因為中國女人扎腳，所以男人就扎頭呢？唔係，原來當時印度錫克兵以布包頭，英國佬為統一軍容，中國兵都要扎頭。

一九零零年，西摩爾率兵進攻北京，遭天津o既義和團攻擊，就出動呢隊華籍英兵，先打天津，再打北京。又因為呢隊華籍英兵作戰英勇非常，打完仗仲得到授勳。我覺得最出奇o既呢團「華勇軍」明明同清兵都係中國人，但係個樣就醒目過清兵好多，睇到呢種分別就知道並非中國人唔打得，而係睇你點訓練同管理。睇粵語殘片見到幾十年前o既香港警察之所以咁重北方口音，都係因為英國人從威海調黎受過英國訓練o既中國人，呢D都係同英國租借威海有關。

去到天津已經成六點，即係同坐五點鐘火車差唔多，晒氣。有數名大漢一見我就好似見到獵物咁行埋黎，原來係兜出租車生意，我話去「大沽口」，回答謂有成六十里路，唔係下嘛！咁遠，去到都天黑啦！兼且以大陸景點五點收工o既習慣，炮台都關門啦！好明顯係之前個的士佬昆左我，佢話大沽口炮台由天津火車站坐十蚊的士就到，唔識扮識，真係多得佢唔少。到左咁o既田地，仲有乜野可能性？我話去見到海o既地方啦！諗住可以憑弔當年聯軍戰艦集結o既海面，但係路程始終都係遠，隨身用品又唔夠，唔可以響度過夜，而為穩陣起見，我話去買左回程火車飛先，班大漢聽見我話去買火車飛，話：「多的是」。

入火車站售票處一問，最後一班去北京o既火車係七點四，又話每日都好多班車o既！又被昆，呢個故事教訓我地，有關天津o既野，應該問天津人，而唔係問北京人。買左飛出黎都搞到成六點幾，想話週圍行下啦！穩陣起見，問下車站職員，應提早幾多時間入閘好，回覆話最好半個鐘，咁我咪得番半個鐘時間！除左去廁所仲可以去邊？一場黎到天津，節目就係去買火車飛？仲有乜野可能性呢？我抱住清明在躬，暗念神秘樂觀，堅信一切最終都會得到圓滿，以哲道打底，手執天人琴，背負思方劍，承擔住中國文化，展開半小時o既天津之旅。

首先去買張天津市地圖，然後進入間商店，問有乜特產。O係個阿嬸推介之下，我買左包「麻花」，即係我地平時講o既扭麻花，係天津三絕之一，其他兩絕係「狗不理包」同「炸糕」，我買埋「炸糕」，先食為快，肥臘臘，呢兩絕各位看官日後去天津見到都唔使買，因為我已經試過，只能稱為「兩拙」。跟住買左包「騾肉」，係錫紙包裝，有牌子，好文明o既，仲有狗肉添，本來想買包貓肉俾明月，但係無，註定佢無口福。

火車站有間「狗不理」，入去問下，一買要買二十個，嘩！我又無帶個女黎，點食呀！出左去諗下，無理由一場黎到唔食足三絕！又入返去問另一個店員，都係話要買二十個，又走番出黎。最後運用「不思考之道」，買左至算，又入去。但係食左個炸糕之後已經滯晒，鑑硬食左兩個，可能o係一百年前呢D包都算美食，今時今日，香港是但一間酒樓都食到啦。

O係火車站週圍望下，跟住就要入閘。拎住兩盒包都知點算好，唯有站起身，拱手向火車上o既乘客自我介紹，講點解會黎到天津，點解會買左兩盒包，點解會食唔晒，然後問有無人想食，個個唔係話飽就話食過。我望下車廂上高個顯示屏，走出行字，大意謂：為左你o既人身安全，請勿接受陌生人o既食物同水。我為左我o既人生安全，飽住肚都當眾食多個包。

坐個幾鐘頭車返到北京，行出火車站一刻，有種好熟悉o既感覺，就如多年前坐火車到達北京時一樣。二十個包只食左三個，其他出左站俾左個乞兒。