獨步北京第四天「四」（24）

離開「南海會館」，跟住係到「璃琉廠」，因為見o係附近，所以行路去，不料又係行過龍，問幾次路至搵到，我始終認為係地圖o既錯。我懷疑係特登用黎陰美國佬o既，因為以前美國佬炸完中國大使館賴張地圖舊，所以中國將計就計，印D錯地圖，有朝一日兩國開戰，令美國佬會走錯路。

「琉璃廠」o既歷史可以追到元朝，專為皇室燒琉璃瓦，到清朝先變成賣古董o既地方。記得上次去北京時係帶住錢仲聯o既《韓昌黎詩系年集釋》o係火車睇，點知去到「琉璃廠」見有得賣，當時真係有種：「早知黎到至買啦！」因為當時香港o既大陸書價係大陸標價乘八倍，大陸平好多。

去到「琉璃廠」好似返左香港咁，滾滾沙塵，大整路，原來係重新鋪地磚。上次黎好似係好少人，感覺好似入左片場咁，仲特登造左套印章，點知渣到暈，字都刻錯，「文」變成「一文」。

今次都好少人，字畫我就無打算買，諗住睇下舊書，點知去到果間「中國書店」都無乜野睇，好細，「古籍書店」又無乜古籍賣。

跟住入去「榮寶齋」，叫做到此一遊，「榮寶齋」創於一六七二年，以水印木刻複製歷代名畫聞名，亦專賣文房四寶。因為呢個階段無乜興趣買文房四寶，又要拒絕街頭兜售字畫o既同志，所以呢一次咁有文化色彩o既「琉璃廠」之行可算悶過去廟街。

臨走先醒起去漏一撻地方，立即折返騾馬市大街，向東行，見前面有座古建築物知道應該係目的地：「紀曉嵐故居」。有睇過《鐵齒銅牙紀曉嵐》o既朋友都應該清楚佢o既事蹟，無需我再多講。

呢間故居好奇怪，新到離晒譜，一睇都知裏面好多假野，九成係大陸佬見套電視劇收得，立即將間屋翻新以吸引遊客。所以欲想譚嗣同o既故居似番個人住o既地方，只要拍番套《鐵臂銅拳譚嗣同》就搞掂。

間屋好細，點解會咁細呢？原來呢度一九三零年時俾陳少白租左黎住，到一九三六年又被人祖黎做京劇學員縮舍同練功場地，一九五八年用黎做飯莊，後來因為擴闊馬路，將院門剷去一大闕，西廂因為開路又剷埋，東廂被飯莊改為旅社，總之呢間屋週圍唔係開路就係用左黎搞飯莊、旅社，搞到得番三分一唔夠，細過梅蘭芳屋企好多。

而屋內o既布置一睇就唔開胃，因為無晒歷史感，既然之前被咁多人住過搞過，跟本就唔可能咁古色古香，呃人，所以好快睇完離開。

為慳時間，坐的士直奔「大柵欄」，由前門大街北上，在車上直望前門o既感覺簡直就係時光倒流，呢個畫面分明就經常o係舊相出現過，只係欠缺左個牌坊。所以落車後冒死企o係馬路中間影左張相。

一落車就被側邊o既一條人龍吸引住，原來係「全聚德」烤鴨店，「全聚德」創於同治三年，已有一百四十年歷史，通常遊客排隊o既係呃鬼佬野，本地人排隊應該係好野。行埋去睇下賣乜，見係一D碎肉，而且唔係長時間有得賣，費事等，不如入去幫襯，順便食埋中午飯。

呢間野用晒即棄餐具，一人片皮鴨餐成七十蚊，真係好貴，出面排隊o既人應該係買片剩o既鴨。碟鴨黎到確係幾香，不過食落口又唔係咁好味，十七蚊就合理。

食完行進「大柵欄」，點解呢度叫做「大柵欄」呢？因為明清時期，京城o既重要胡同都會裝上大閘，晚上鎖住，而呢度因為係商業大道，所以度閘特別大，故名。以前o既紅燈區「八大胡同」都係響呢度附近，賽金花當年就係o係果一帶打躉。

呢度有好多北京o既老字號，有二三百年o既老店，人就係多o勒，不過唔覺有乜特式，路窄又烏煙瘴氣，我又唔係女人，都唔中意行商店，連「同仁堂」我都無行入去就走人。