獨步北京第三天「三」（14）

沿住「鼓樓西大街」向西北行，行左唔止三百米，有D後悔唔坐車，又晒咁D時間，見有似樣D既建築物就留意下，見有書局又行入去睇下，依家興出D名人選集o既線裝書，例如季羡林呀咁，但又唔係週圍有得賣喎，D大書店反而唔見有，大陸D發行就係咁紊亂，希望遲下可見《哲道行者》線裝版。再問人，個阿姨叫我繼續向前行，然後轉左入一條胡同，出去就係。我如其所言，一見有路口就轉左，穿過一條胡同，到盡頭，豁然開朗。

原來到達「後海」，再遠D係「西海」，向番南係「前海」，過左地安門大街係「北海」，過埋景山就係「中海」同「南海」，「瀛台」就響入面，光緒皇以前就係o係入面泣血。胡同口見有人正在剃度，附近顯然係有寺廟之類。

再問人「宋慶齡故居」o係邊？又指返我向東南，即係行左冤枉路。呢日好大風，有個穿住綠色制服o既人迎面行黎，用力吐篤大痰都被風吹左落隻鞋度，如果再大風D可能會吹番落個口度。「後海」呢度比起「前海」同「北海」都少人得多，一百年前呢度應該仲清靜，響度住得一年半載，我諗行步路都寧舍有風範。終於見到「中華人民共和國名譽主席宋慶齡同志故居」，而且係用繁體添，可見大陸唔係想尊重傳統，而係想俾台灣人睇，國父個女人係佢地名譽主席。

呢度門口有人站崗，等我仲以為唔俾入添。呢度原本係愛新覺羅載灃o既王府花園，佢阿伯係光緒，溥儀係佢個仔，溥儀在位時佢任攝政王，一講起「攝政王」大家可能會諗起汪精衛，汪精衛曾經想暗殺載灃而未成功，在獄中寫下詩句：「慷慨歌燕市，從容作楚囚。引刀成一快，不負少年頭」，若果佢當時就死左，相信會成為中華大英雄。

宋慶齡o係度由一九六三年住到一九八一年逝世，一共十八年。呢度有支旗杆，稱之為中國第二號旗杆，而第一號就o係天安門廣場，剩係呢樣就可知大陸幾咁重視佢，不過唔知咁樣係因為宋慶齡o既地位夠高，定係大陸要將佢從新包裝。

呢度o既古建築有部份係建於宋慶齡時代，我當呢度係載灃o既花園去睇，一見介紹原來係建於幾十年前，咁就無乜心機睇落去。

展館中間有個天井，有兩棵樹開滿花，比起「雍和宮」果棵仲要靚，唔只花香撲鼻，直情係滿身花香，總之響人少o既情況下處於呢種地方，真係洗滌心靈。其中一個室有音樂傳出，原來係播出宋慶齡o既記錄片，我坐低一邊睇一邊食包包，食完打電話俾女友報平安，後來返香港收到電話費單總共為四百大元，電話費已經可以住兩晚賓館。

宋慶齡住o係展覽館隔籬，係後來特登起俾佢住o既，核突好多，我從後來發覺無影到果座野就知道當時係影唔落手，唔怪得知宋慶齡住十八年就死左。入到去可能人少入黎關係，無人睇場，既然得我一個，話唔准影相我自然照影，呢D係自然反應。

呢度o既擺設號稱無郁過，就算同堵牆上油都唔將D傢俬搬出去。只有其中一間房有人睇場，但係又係白竇人工o既，我照偷影孫中山用過o既墊巾，孫中山咁私人o既用品都可以出現響我眼前，真係好奇怪。

我幻想下如果住響度o既感覺會係點，呢度地方唔算話好大，但係我成日覺得呢度得宋慶齡一個住，所以覺得有種寂寞o既感覺。個露台可以通過幾間房，從呢度望向房間同從門口望入黎好唔同，好似係客人同主人o既分別。房裏面o既物件好懷舊，響八一年應該算係幾先進，建成展覽館時可能唔係好覺，但係擺下擺下就成為古物，遲下D人黎參觀o既感覺就好似我地依家去睇慈禧太后o既寢室咁。