獨步北京第二天「四」（9）

離開「觀象台」，睇住指北針沿住建國門南大街向南行，好快眼前就見到一段城牆o既斷口。週圍仲有工程，唔知係建立定係清拆，我沿住城牆行。

當年《人間四月天》林徽因個老公；梁啟超個仔：梁思誠，佢係搞中國古建築研究o既，當年曾經爭取保留北京城牆，並寫下藍圖，提議將城牆建成公園，但係毛澤東一於好少理，照拆，可能你唔出聲仲好D，你話唔好拆o丫嘛！我就拆俾你睇。等我一直以來以為睇城牆要去南京、西安、平遙等地方。

行行下見到有個缺口，係地盤，睇得出城牆兩邊用磚砌成，中間填滿泥土，我搏矇走入去，被人趕返出黎，我問佢呢度搞緊乜野？佢話唔知，一味叫我走。可能佢專係負責看門口，終日無所事事，難得有人被佢趕，所以相當落力。

但係我為左發揚哲道精神，我行前D搵到一條橫切城牆o既路，我行入去，然後以八步趕蟬躍上崩左o既城牆上，就好似郭靖跳上襄陽城咁，只見一片敗瓦，廢墟，見到頭先唔俾入果段城牆，無乜特別，頹垣之中，有個阿伯望住我，我唔理佢，影幾張相然後跳返落黎，就好似李博士響襄陽城咁。

繼續向南行，無耐就見到一座箭樓，呢個場面通常都只能夠o係拍於清朝時o既照片見到，仲多數係爛o既添，因為係拍於八國聯軍侵華時期，城樓都被大炮轟爛一大闕。

北京城分內外城，前門以南為外城，多為漢人居住，內城則以滿人為多。內城之內仲有皇城，響「紫禁城」之外。現時王府井大街隔籬有一「皇城根遺址公園，即係從前皇城o既位置，皇城之內仲有「紫禁城」o既城牆，「東便門」位於內城右下角。

行到箭樓下面，有塊寫住「北京城東南角樓」，後面有兩塊介紹o既牌，我行去睇下，有以前「東便門」o既舊貌。旁邊凳上一個老坑公見我睇得仔細，對我講「那些已經沒了」，難得佢咁O頻，我都上前向佢請教一下。

我問佢係咪北京人？佢講係。咁就o岩o勒！即係話佢生存於北京有城牆之年代。

我問點解仲有一段城牆響度？佢話就係拆剩呢段，係周總理下令停拆，話再拆北京就無晒城牆。

我一直以為北京只有拆城牆，但係保留城樓，仲諗住今次要逐個城樓去參觀。問佢北京仲有幾多個城樓，佢話仲有「前門」，呢個就係人都知啦！我問仲有無？佢答無o勒！我問北京一共有幾多個城門？佢話九個，仲問我有無聽過以前有個官職叫做「九門提督」？係喎！

咁英法聯軍同清兵大戰o既「八里橋」，有無橋o架？佢話無，果度以前係一片平原，依家已經起左好多樓，無野好睇。咁即係去度想搵撻可以投入D憑弔o既地方都無啦！

我問北京仲有無護城河？佢話已經鋪晒路。我問咁仲見唔見得到？佢話見唔到。

咁八國聯軍係咪響度打入去？佢話應該響「廣安門」，我一睇地圖，「廣安門」響北京城o既左下方，即係西面。我話八國聯軍從天津打過黎，應該從東面攻城，點解會行去西面攻？唔通佢地好得閒？或者好似我咁見到條城牆咁壯觀，所以好似我咁跟住條城牆行，先參觀，再攻城？佢始終堅持話係響西邊攻城，可能佢認為D洋鬼子係來自西方，所以要由西邊攻城至合理。我記得有幅相係法國軍行過「蘆溝橋」，而「蘆溝橋」就響北京左下角o既郊區，咁又係西面喎！一時都搞唔清楚。

我話我以前黎過北京，都唔覺有呢段城牆。佢話呢段城牆一直存在，只不過以前城牆下有好多民居，後來政府遷走晒D人，然後將城牆重修。因為依家o既磚大細同以前唔同，要靠市民捐返D舊磚出黎。北京人用城牆磚、長城磚、圓明園o既石起屋，甚至搬入「圓明園」住，已經係傳統。所以有城牆磚一D都唔出奇。

佢話依家城樓下側邊果度門，以前係俾火車入，沿住城牆行都仲會見到一段以前o既鐵路。我問以前火車站響邊？佢話o係前門。O下！咁架火車咪一直穿過內城入去！

我問「袁崇煥」o既祠係咪o係附近？佢向南一指，話好近。我睇下，有無咁近呀？同地圖所標註o既都唔同o既！

佢話我好熟歷史。我心諗，呢D都係基本常識o者！小學生都知啦！兼且我仲有睇「長老隨筆」，又點難得到我。

其實個阿伯所講o既好多都係錯o既！大家唔好以為係北京人就一定對北京o既一切都好有認識，就等如隨便問一個中國人有關中國文化o既問題，佢地都未必答得到。就如並非凡係基督徒所講有關基督教o既野就一定係正確。呢個係今次去北京o既一個經驗，不能盡信，否則會吃虧。

現時呢個東便門城樓已經成為公園，並對外開放。我別過呢位老人家，進入城樓參觀。買左飛入去，心念一動，走返出去搵返個阿伯，話請佢上去，希望佢講多D典故我知，可惜佢話要返屋企，同我沿住城牆行下就得，結果我只有自己上去。老人家叫我只睇城樓，其他D仿古建築係後來加建，無歷史價值。講得好，唔好浪費時間響D呃鬼佬野度。