1st pre-wedding @ 新天地

今朝一早六點幾就起身沖涼洗頭，執好所有濕碎o野，再食少少早餐便出發去【新天地】，九點正去到，點知一個 staff 都無，所以就坐低等等囉﹗

無幾耐，有 staff 開始出現，首先收o左 $100 按金開 locker (男女各一個)，不過個 locker 真係好細，連我個袋都擺唔落，正o係我諗緊點擺之時，有個 staff 二話不說將我個袋打直放入 locker，結果，入面o的o野亂晒喇﹗﹗

放好o野，換鞋、Girdle、打底褲，換第一套婚紗，然後就坐低化妝喇﹗之前 book o左 T.Soo 化妝，o係盡量安排下都真係安排到，不過佢比我想像中 cool，基本上除了一開始問我想要乜造型外，之後都無乜同我講過o野。其實造型方面我都無乜所謂，算講o左少少 idea，但 T.Soo 話唔襯第一套婚紗，所以好似無乜點理我 ~~ 唔緊要啦﹗總之唔好幫我整皇冠就得架喇﹗

我個雙眼皮有點麻煩，但 T.Soo 好細心幫我化，妝前妝後真係好唔同呀﹗第一個造型就係花花頭飾 + 兩邊曲髮，我自己就幾喜歡喇，希望出o黎個效果 ok 啦﹗

化好妝，等攝影師之前，先可以選定心水景點，唔覺唔覺都選了不少 ~~ 終於等到攝影師 Alex & 助手阿 Ben 出場，其實 Alex 之前都見過幾次，所以一o的都唔覺陌生 ~~ 拍了幾張 testing testing，其實左右面都差不多啦，Alex 你話事啦﹗第一套婚紗影了：木馬、連理樹、教堂、小樓臺、花店、老爺車、水池 …… 中途 Alex 俾o左張我 preview，咦 ~ 好似幾好咁喎﹗希望啦﹗

換婚紗，轉造型：lace 頭飾 + 古典頭 + 大拖尾通花婚紗，個造型我又好喜歡，之前睇 expo catwalk show 都鍾意呢類造型，估唔到 T.Soo 會幫我整呀﹗攪掂就食少少餅，好快又繼續影喇：秋葉園、茶座、鞦韆、搖搖椅、涼亭、宮庭、書房 …… 影宮庭時，Alex 又俾幾張我 preview，又係好似 ok 喎﹗

又轉造型喇，原本 T.Soo 想幫我整禮帽，不過頂禮帽太大喇，我唔多喜歡，所以改o左用閃花 + 毛毛花花 + 粉紅色晚裝。呢個時候有點累喇，加上室內景麻麻o地，所以都無乜期望嚕。

上次o係 expo 搵 David 落單時，佢 free o左民族造型俾我o地，本來諗住影唔影都無乜所謂，但助手阿 Ben 叫我o地選衫咪選囉，結果我們選了中式衫，但o的衫真係好嚇人，又 dirty，o的景更加睇到都唔想影，哈 ~ just for fun 啦﹗

影到四點，終於攪掂喇，唔算好累，但都真係一身鬆晒，落埋妝 (有點求其啦﹗)，執好o野，約埋揀相時間啦走喇﹗

本來 4 號已經有得揀，但【新天地】o個邊話星期六 / 日揀相唔可以帶朋友一齊揀，咁所以唯有轉為 7 號揀喇﹗仲有幾日咋，好心急呀﹗