裁剪深造班第11堂

今晚yahoo攪mud鬼呀? 壞咗咁耐我以為出唔到裁女手記呀!  人地啱啱想瞓架喇!

講番今晚上堂先,今晚返到學校好開心,因為師姐攞咗好大袋布辦比我,有真絲、雪仿、紗、Lace,仲有其他唔同類型質料嘅布,總之質料靚到暈,尤其係Lace質料嘅布,簡直多到不得了,不過我最鍾意嗰塊就比同學攞咗! 我唔知佢睇中嗰塊,所以佢問我可唔可以攞一塊時我仲叫佢自己揀,但點知原來佢一早睇中嗰塊,雖然我唔想比嗰塊佢,但既然佢已經揀中而D布又係師姐送,所以亦唔好意思唔比,不過好唔捨得囉! 鍾意就係鍾意,雖然我有好多布,但事實我最鍾意就係嗰塊,下次一定唔可以咁蠢,比人揀野時要事先講清楚自己唔想比mud野,叫佢再揀其他啦!

今晚課題重點就係畫晚裝圖,原來主要係由公主褶 +六幅裙原理演變,主要著重剪裁方面,但因為後幅都教咗一堂,所以未教畫前幅。睇完後幅嘅圖我覺得其實呢條裙唔一定晚裝至可以著,都可以當一般長裙著,只係用咩布料做就有咩效果,假如用棉質做的話咁平時都可以著得番,當然就唔好加咁多隆重嘅無謂野啦! 仲有就係唔好做Deep V,咁就一定無問題喇!