網誌分類：日誌 |
話說上個禮拜日, miss咗個有來電顯示嘅電話, 唔知係邊個打嚟, 所以就回翻嗰個電話啦, 點知打翻轉頭係話電話號碼唔正確, 就知道有古怪喇. 過咗冇幾耐電話又響喇, 係個自稱"無線高清技術部"嘅男士, 反正冇嘢做就聽吓佢up乜啦.
男: 你係X小姐呀呵? 裝咗無X收費電視
^ - ^: 係呀
男: 但係裝咗高清盒未呀?
^ - ^: 未喎, 暫時冇需要裝住, 我部都唔係高清電視, 裝嚟都冇用啦
男: 唔係, 只要你買咗個我哋指定嘅高清盒, 我哋就會同你免費安裝架喇
^ - ^: 係咩 (真係唔駛要嗰D咩1080高清電視都得?)
男: 你唔知咩? 普通免費電視(唔係高清嗰隻)睇到12月31號架咋, 之後就全部要睇高清架喇
^ - ^: 係咩? 冇聽過喎
男: 嗱, 你去豐X, 國X電器etc 買呢幾個指定牌子高清盒 (Magic TV / Oliver / VIDGI), 買咗之後我哋就會上嚟同你裝架喇, 我哋仲會包埋你火牛,全套線添架, 錯過咗呢個機會你就要自己去鴨X街買火牛同線架喇
^ - ^: 嗯.... 你都底係邊度打嚟架
男: 無線囉
^ - ^: 不過你哋上嚟推銷嗰位sales話裝咗收費電視個盒就睇到高清, 唔駛再裝高清盒架喇噃. (真係冇需要睇高清, 所以從來冇試過)
男: 梗係唔會啦
^ - ^: 係咩, 但係真係你嗰位同事講架噃
男: 唔會架, 你要同佢哋搞清楚喎, 如果真係誤導可以退錢同消約架
^ - ^: 吓... 你哋唔係同一間公司架咩? (同一個老闆可以咁講嘢架咩)
男: 係同一間公司, 但我哋係技術部嫲
^ - ^: 係呀.... 等我同屋企人商量吓先啦
男: 哦... 咁好啦, 過兩日再俾同你聯絡啦
(跟住就冇再打過嚟喇)
為証實無記係咪真係會咁打電話嚟 (基本上知一定唔係無記, 但都想佢哋知有人用佢哋個名嚟招搖撞騙), 所以就打去無記啦, 駁嚟駁去都冇人聽電話喎, 一味得D電腦聲, 最後就駁去申請收錢電視嗰度一定有人聽啦. 果然有"人"聽喇, 就同佢講呢個情況, 佢話唔係佢個部門, 會將事件交俾客戶服務部跟進, 24小時內會有人同我聯絡, 點知係3日後至有人打電話嚟. 打嚟嘅係一位男士. 佢當然就係話佢哋冇用呢個手法嚟叫人裝高清盒啦. 我話我都知應該係呃人嘅, 但都想佢哋知道呢件事啫. 最後就凈係答咗個"哦"字.
係無記習以為常呀, 定係電話入邊嗰住男士莫不關心呢. 是但啦, 做咗應該做嘅嘢, 又以我嘅聰明才智冇俾人昆到就得啦 
但係所謂嘅高清技術部嗰位男士又係為咗乜嘢呢 
斷估唔係上門打劫架 佢又係點攞到我個電話, 仲知我姓乜, 同裝咗收錢電視架噃 真係費解喇.
現今個世界唔打醒20分精神都唔得呀. 世界變得越嚟越醜陋. 要分清是非善惡真係越嚟越難.
