2009關西10日遊 奈良 Day1-1

今日終於起飛喇, CX506-1020直飛關西機場, 兩個幾鐘就到喇.

就算再去關西, 以後都係撘零晨機再轉機好喇, 成機都係香港團, 過關要排好耐隊.

出咗機場就坐巴士喇, 雖然JR係平D ,要1430円, 巴士就要2000円, 但係都係鍾意撘巴士多D, 唔駛轉車, 件行理鬼噤重, 巴士到嘅都會盡量撘巴士. 今日比較塞車, 所以坐咗個半鐘, 司機叔叔話平時1個鐘左右就到架喇. 到酒店已經5點幾喇, 落雨, 但係唔算凍. (仲等隻老鼠仔搏命叫人帶衫, 不過算啦, 佢叫帶就帶啦. 上磅嗰陣成19KG差D超重呀. 不過都唔怪得晒佢嘅, 一來佢都係為我好, 一個人去旅行都係帶多好過帶少, 二來自己又要帶D手信過嚟至會搞到噤重啫. )

全程酒店都喺樂天book嘅, 奈良呢間係 天然温泉のスーパーホテルLohas JR奈良駅, 就喺奈良JR站隔離, 有温泉, 包早餐, 今次好早就book, 好平, 5480円一晚單人房, 雖然間房係細D, 但係噤嘅價錢有噤多嘢, 又好乾淨, 好滿意喇.

Check-in 之後就寄走晒帶嚟D手信喇, 大概860円一份啦, 平過喺香港寄, 仲有就係心意嫲, 一場嚟到, 唔去探人都帶D手信俾人啦, 佢哋好鍾意食我哋D合桃同埋腰果架, 所以次次都帶D過嚟俾佢哋. 而家個喼咭晒lu.

因為聽係日本假期, 今晚酒店比較多客人, 温泉一定好爆, 都係聽日至去探佢啦.

聽日一早起身, 食完早餐就起程, 目的地-伏見稻荷神社-鞍馬-貴船. 哈.. 哈... 係咪好奇怪呢, 嚟奈良第一站就去京都. 因為舊年去京都嗰陣唔夠時去呢兩個地方, 今年第一件事就係要補翻.