網誌分類：旅行 |
圖片
網誌日期：2009-01-14 17:15
京都嘅第二日一早6點幾起身. 同平時返工噤上下, 但係當然係比返工精神啦! 
7點左右就喺大堂食早餐, 都唔錯架. 食食吓電話响, 原來係住喺宇治（うじ）附近嘅一個朋友打嚟, 出發前俾過貓貓佢話會喺呢幾日喺京都, 所以佢打嚟俾我睇吓有冇時間見面. 跟住就約咗11:30喺宇治等喇.
食完早餐都係得嗰7點幾, 8點都未夠, 有排都未夠鐘. 於事上房攞翻個相機先喺酒店附近遊蕩.
由JR站開始沿住烏丸七条（からすまるしちじょう）一直向前行大概20分鐘左右(蝸牛式)就蕩咗去東本願寺（ひがしほんがんじ）喇.
清潔中嘅東本願寺
細個去舅父屋企都係咁抺地嘅, 阿媽都咁教, 但係噤多人, 噤大地方, 噤壯觀都係第一次, 所以企咗喺度欣賞咗10幾分鐘. 其間有人見到我企咗喺度噤耐, 以為我係想經過通道過對面, 所以就叫全世界停手等我先行, 當我話係欣賞緊佢哋嘅時候, 佢哋仲叫我試吓添. 
吓! 冇嘢吓嫲! 都知道大家係友善嘅, 但抺抺吓抺上癮咪弊, 仲有噤鬼長, 一個唔小心會五體投地咁扒街架 (細個喺舅父屋企成日都抺到扒街架). 都係咪喇. 所以就話有約,係時間要起行喇. 咁又真係架喎, 都唔算 hea 佢哋呀. 跟住就走咗lu.
喺東本願寺映完一大餐之後就出行翻去JR站, 用230円買車飛過宇治喇.
今次冇買到JR Pass, 雖然係由關西落關東, 但坐巴士多, 所以冇需要. JR唔係唔好, 但有時會比較轉接要轉幾輪, 好煩! 
大概20分鐘車程就去到源氏物語（げんじものがたり）~ 宇治. 一個充滿浪漫, 悲情, 美艷嘅時代 
続く
