伴我翱翔kick off ceremony

距離上一次寫blog都差不多兩個月啦, 好多人都問我幾時update, 我就覺得要有題材先至寫比較好d, 因為日常嘅事响facebook都會知, 所以我會有選擇性, 今次想同大家分享嘅係上星期六同一班同事去做義工, 喱個program係由政府福利局+青年協會舉辦, 我哋公司prudential全力贊助嘅"伴我翱翔兒童發展基金先導計劃".

我哋服務對象係新界西一班10至16歲嘅青少年, 計劃為期兩年, 目標係喱班青少年每月定期儲蓄200蚊, 我哋公司就資助佢哋200蚊, 到計劃結束時連同政府資助, 合共有12,600蚊. 咁就可以實現佢哋一d夢想, 而响兩年計劃當中, 我哋就擔當佢哋嘅師友角色, 需要定期探訪同聯絡, 確保佢哋能夠達到目標. 而上星期六就係喱個計劃嘅啟動儀式, 一早八點幾就要到葵芳報到, 展開一日嘅活動, 之前好期待想知道自己要揍嘅小朋友係點嘅, 我哋係一對一, 總共有120位青少年同120位義工, 之前仲要接受面試同trainning, 從200幾位同事挑選120個義工, 咁我就係其中一個嘞!!

我需要服務嘅對象係一個11歲讀5年級嘅女孩, 經過一日同佢相處, 雙方都有初步了解, 佢媽媽都有嚟, 而我同組同事就serve佢嘅同學, 所以我又識咗多一個本來唔識嘅同事, 佢係18樓嘅亞mark, 我哋交換咗電話, 可以日後相互交流吓.

當日有福利局局長張建忠, 青協總幹事黃易鳴博士, 當然唔少得我哋公司嘅行政總裁jeff walker. 响致詞時, 張生同黃博士都不斷多謝我哋公司嘅慷慨, 响經濟咁差嘅時間出錢出力同出心去籌辦喱個咁大型嘅計劃, 同時張生講話香港面對"貧富懸殊", 要將個距離拉近係需要教育下一代, "隔代教育"係好重要, 佢話因為我哋係"先導", 希望我哋做得好,政府就可能會繼續撥款資助, 咁就可以有更多嘅青少年受惠, 做到"薪火相傳" 所以我覺得個計劃係相當有意義, 好慶幸有份參予. 可以實踐"教學相長".

輪到我哋CEO-jeff walker致詞, 自己聽完都好感動, 好 proud of 自己係prudential嘅一份子, 佢話希望喱個program能夠讓一班青少年學識儲蓄嘅習慣, 理財慨念懂得理財技巧, 可以實現自己嘅夢想, 如果我細個時已經有喱d program就好啦!! 同時佢都好多謝我哋一班義工付出時間去參予, 佢話我哋應該辛苦過返工喎, 哈哈!! 感動嘅係公司確實展現咗"商界顕關懷"嘅承諾. 難能可貴!!

到咗下午4點幾就結束, 我就倦到飛起, 因為前一晚只係瞓咗3個鐘, 不過絕對值得, 好彩亞wing叫我起身咋, 之後同亞wing去食tea. 咁就完成咗一天嘅任務. 之前我都有同d同事分享過, 希望下次有機會再辨時佢哋會響應, 共創小朋友美好將來, 為社會出點力.

我唔打算uplaod d相, 因為我當日冇帶相機, 所有相都係响亞wing到, 要睇吓有幾精彩, please visit wing wing 哋嘅blog啦, 真係打攪哂亞wing, 不過我知你唔mind嘅呵??????buddy.