網誌分類：未分類 |
圖片
網誌日期：2009-06-06 00:46
今朝4點morning call, 起身刷牙洗面後依然覺得好唔舒服, 諗咗一陣決定放棄睇日出, 費事纍街坊要人抬落山嗎, 瞓到7點joey睇完日出返嚟攞咗d粥俾我食, 食完再瞓, 瞓到10點起身準備出發落黃山, 瞓多幾粒鐘情況又好番好多喎.
响酒店門前映番張合照先出發
沿路落山, 景色比尋日仲靘, 最大原因係天朗氣清, 感覺好似大地在我腳下.
我同joey唔怕死, 爬上d石上面映相, 睇落好似唔係好高, 實情係好高架, d同事都叫我哋小心d. 但咁遠嚟到, 唔理得咁多, 映完至算.
今日仲慘, 要攞住d行李行, 又係石級, 見到都驚.............................................
到搭纜車落山時, 冇嘢玩, 同魔記映番幅相, 亞嫂叫我哋掹住佢老公隻耳映相, 張相係亞嫂映架, 真抵死!!
黃山嘅山腳
喱個就係上黃山嘅導遊小秦, 佢真係好勁, 係山上面走上走落, 面不改容, 果然後生可畏
離開黃山後再去黃山博物館參觀, 不過已經好倦, 只係映咗幾張相, 之後當然係屈你買嘢嘅時間啦, 我老細出晒名"購物狂", 緊係唔會手軟, 不過俾人喪斬囉, 我叫咗佢唔好响度買, 佢係都唔聽, 話說佢見到一隻叫"神奇毛筆"嘅物體, 好神奇, 但賣2佰幾蚊人民幣, 我同佢講香港都有得賣, 一定唔駛咁貴, 跟住佢又傻更更俾人sell, d 質地靚好多兼送你幾張神奇畫紙. 最後人哋係咁意減d價佢就買咗, 仲歡天喜地話原本260蚊, 依家只係220蚊, 真係俾佢激死. 其實我都想買, 因為我d毛筆字都寫得ok架, 買嚟得閒寫吓, 但2佰幾蚊確實有d狼囉, 咁我當然唔會好似我老細咁傻啦, 哈哈, 到咗食晚飯嘅時間路經"老街"俾我發現有得賣, 問吓價先, 開價65蚊, 畫紙就18蚊50張, 終於俾我講到45蚊成交兼送50張畫紙, 你話我老細係咪"on 居"吖!!
喱度就係食晚飯嘅"老街", 今餐都ok好味, 食完飯就行街買手信, 之後去咗揼骨, 揼完出嚟又落大雨, 近在咫尺嘅酒店都無法行返去, 唯有搭的士, 返到酒店後就瞓覺準備明天一早出發去"千島湖", 兩日嘅黃山行就此結束啦.
