晴天霹靂~~~

上個月，去山頂醫院度頸皮，但係因為週數未夠大，所以做唔到，所以就約咗今日再去...

去到掃描室的時候，幸好無人等緊，所以去到已經即刻有得睇呀...

但係，細妹妹曳曳呀，醫生睇來睇去都睇唔到呀，叫咗我出去行一陣，等細妹妹可以郁動吓，轉換一吓位置，而我呢...就好乖，出咗去山頂醫院行咗個圈呀...

再返去掃描室，哈哈哈...醫生的反應都係「你再出去行一陣啦，不過今次唔好行咁遠喎，等我做埋出面個CASE，睇吓做唔做到，再睇過啦」

第三次...再返到掃描室，今次細妹妹終於合作呀，睇得到呀...不過我就唔明醫生係度做緊咩呀...

突然之間，醫生同個姑娘講：「秘書係唔係度，幫我搵佢呀」

呢一刻，我突然之間覺得有種好不安的感覺，點會無端端搵秘書，起初我以為細妹妹又睇唔到，所以要搵秘書約明天再幫我睇過...

但係...後來秘書搵唔到...我都唔知發生咩事...

後來報告出嚟，醫生叫我坐低，但係我見其他做完掃描的人，醫生姑娘都好輕鬆，有講有笑咁的，全部都係企係度，好快就走得的...

之後，我見到醫生係咁電腦度輸入好多資料，跟住她就開始同我講...

話細妹妹的頸皮厚，有機會可能係「唐寶寶」，機會242份之1(根據懷孕年齡及頸皮厚度計算出來)，度頸皮的準確性有70%

醫生話如果頸皮厚度高過2.5mm，她們就需要通知懷孕的婦女...

她建議可以等到係16週之後的再抽血，而呢加埋度頸皮的2個檢查，準確性會有85%

又或者...可以按週數，再進行抽毛絨，但係呢個測試，會400個BB中，有1個會有流產的機會

如果抽血的結果係陰性，咁「唐寶寶」的結果就會減低好多，但係亦有機會係因為其他器官有問題會引致頸皮厚，所以需要專科醫生一直去跟進...

另外，醫生又話有20%會有漏診的機會，即係咩都無問題，出咗世都唔會有問題出現...

聽到醫生的說話，我個心即刻沉哂，唔知比咩反應，亦都唔知點算好，當時得我自己一個去，我都唔知點算...

最後，約咗下星期去睇專科，到時候，再睇吓點樣...

搭巴士返屋企的途中，我喊咗幾次，好驚細妹妹有機會係「唐寶寶」，咁點算，我唔想再無多一個呀，上次，已經好難受呀，我唔想細妹妹有事呀...