觀塘舊照

住左係觀塘超過20年. 最近係中央圖書館搵到d 舊照, 令我更了解觀塘既發展.


官塘月華街. 1980年, 當時月華街巴士總站尚未出現~~



1970年, 興建中既官塘游泳池. 右上角係藍田村, 左中係俗稱雞僚既翠屏村徒置區, 前方係 "大坑渠", 右中係官塘警署宿舍, 隔離向上既斜路, 應該係將軍澳道,
最左上角, 應該係秀茂坪既某學校


 應該係佐敦谷既徒置區. 圖中有間白色, 長方型既建築物, 唔知係咪淘大既工廠呢??

/
1960年左右.
遠處應該係茶果嶺油庫, 係83年左右搬走 (現址麗港城). 右邊係官塘工業區. 中間打橫既道路應該係官塘道既初型~ 前方既係俗稱雞僚既翠屏村徒置區. 右邊有座小山, 應該係未開發既月華街, 和樂村一帶!!


1963年左右既官塘. 右邊係官塘工業區, 官塘碼頭前身. 中間黑色既道路應該係牛頭角道或者官塘道既前身. 相片中間, 有條向上既道路, 係現時協和街既前身. 係兩幢白色樓宇後面, 有一列矮既樓宇, 就係和樂村啦 . 頂方, 應該係未開發既將軍澳同清水灣一帶.


最中間既樓宇, 現址係福寧道官塘職訓中心. 後面起緊既係月華街 官塘大廈


呢幅應該係70年代既官塘工廠區. 已經發展得好蓬勃. 左上角係藍田村, 如果好眼力, 仲睇到右上角有茶果嶺, 油塘村添!


70年代既官塘. 中間係官塘工業區, 左下係茶果嶺同埋油庫. 係圖中間, 半山有一堆白色既建築物, 可能係現時既樂華村.


1958年既官塘. 仲係填海階段. 除左工業區, 只有極少量住宅! 相片近處應該係牛頭角花園大廈. 沿牛頭角道再行, 就見到應該係現時宜安街一帶既樓宇. 留意遠處, 小山後有一堆建築物....... 會唔會係鯉魚門道村呢? 唔敢肯定!!


同樣都係1958年既照片, 不過從另一角度. 留意, 原來現時官塘法院, 麗港城一帶, 原來係海黎! 當時仲未填海!!
相信,  當時海岸線只係去到茜草灣, 茶果嶺, 現時月華街既半山 (唔知當時叫咩名), 功樂道半山 .... 即係整個官塘市中心 / 工業區都係填海得黎!!



1958年既照片. 估計影相位置應該大約係現時物華街左右!!



呢張係1963年左右既官塘. 雞寮, 和樂村剛剛完成, 相片前方, 應該係秀茂坪, 真正移山填海!!



70年代既官塘. 中間既大道路係現時既協和街, 左邊係和樂村, 雞寮, 月華街一帶. 右邊係合和, 協和大廈, 瑞和街一帶. 左邊既支路係現時既翠屏道, 最前方既係興建中既官塘瑪利諾中學.





2張都係1963年既雞寮 (翠屏村). 上方係和樂村, 當時和樂村恆安, 居安同新安樓都未起!! 原來以前d街坊係講真, 恆安, 居安同新安樓都係好遲先起!!



興建中既鯉魚門道村 (又名官塘新村) (現址為鯉安苑, 匯景花園). 當時藍田村仲係一座山!!



60年代中既官塘. 中間既道路係官塘道, 遠處填海區就係現在既九龍灣, 德福花園一帶. 右上方 (官塘道灣位附近) 可以見到興建中既牛頭角下村. 照片既下方有d 平房, 現時係官塘泳池.



1966年既裕民坊, 輔仁街交界. 左邊係銀都戲院. 原來而家既百佳超市, 40年前係 "大豐燒臘"!! haha!!


1966年既官塘道, 現時官塘地鐵站前面. 3層既建築物係現時既官塘政府合署 + 健康院. 上面既建築物係月華街既樓宇. 右邊山上既建築物係藍田村.



1977年既官塘. 中間既樓宇係舊秀茂坪村, 前方係舊藍田村, 中間白色3座樓宇, 係現時既協威園, 華峰園, 隔離就係聯合醫院舊院. 好眼力既, 見到再後d, 就係興建中既三順啦! 好眼力的話, 左上方應該係彩雲村. 最遠既, 山腳下應該係慈雲山村!!!


1991年既官塘:
右邊既係月華街既樓宇. 中間粉紅色既, 就係重建中既翠屏村 (從此雞寮呢個名開始消失~~~)
中間橫誇官塘道既就係興建中既官塘繞道. 前方係興建中既藍田地鐵站, 當時上蓋既匯景花園仲未動工. 右中興建中既就係麗港城. 照片既頂方, 係魔鬼山同照鏡環山. 右中上係油塘村, 鯉魚門, 左上方係藍田村同興建中既德田村.