POLYU朋友-生日聚會

今日7月1日，係香港回歸11年的大日子，所以放假，正 ^_^ !　亦都係同朋友仔 Scarlett 、大雄慶祝生日的日子　！！

　　今日係為左慶祝POLYU的朋友仔 Scarlett 同大雄的生日而出黎食飯。

出席的人有：我、Cindy、Jacky、Fiona、Pete 同埋 Kitty 8 個。

地點：旺角信和對面的創興入面的一間大排檔

首先要多謝Fiona幫手約人，因為我好懶約人ga，有佢幫我實在太好了。不枉佢係我地 飯靚蘇 club的其中一個CEO (CHIEF ENTERTAINMENT OFFICER)，其他的包括我同埋呀ＰＥＴＥ。

        就係o甘，當日 Fiona 就約錯左地點，事後佢話係短訊打錯字而唔係專登的，我當然接納解釋啦，約錯地址去左始創的係 Kitty，哈哈。結果Kitty 就行左兩個地鐵站，由太子入站到油ma地出站，直到7:45先到達。

         今餐的地點係我選的，我同以前d同事黎過好多次，而家有時都會同佢地黎食。因為覺得幾好食同易搵位，所以就約佢地黎試下law。不過睇佢地好似唔係好岩食，個人口味唔同，試下唔岩就算 law，下次食第間。

        當晚叫左8個2人餐，有魚翅及八個小菜，有飯，有糖水及自備生日蛋糕。蟹黃翅好好食，翅同蟹肉都多，每人有兩碗，都算ok啦，但好熱氣(食左個翅同黃金蝦之後失左聲啦)。我叫左個黃金蝦，其他的有蟹、魚雲、蠔…..唔記得lu。d主菜份量好細，係真正「小菜」，好在我地女仔多ja唔係肯定要再食過，但呀Pete就好似唔夠食。雖說份量細，但勝在好食。

        食左正餐之後當然係食生日蛋糕啦，係tiramisu黎ga。因為我無手拎，所以就叫埋fiona去買喇。

（ｄ相影出黎唔係太好，而且又無時間執，所以．．．）

                我同Poly的朋友識左9年lu，佢地係我的一班好朋友。雖然平時通常都只係出黎食下飯，吹下水，無乜特別嘢做過，但就係中意o係埋一齊。識到佢地係我的福氣，哈。

                出年就係10週年了，我地話要舉辦一連串的慶祝活動，其中包括去camp。去book d大學時代的o camp地點，不過我地就係搞 “old camp”，哈，正呀。希望到時真的搞得成。

      　　  在此希望我和我的朋友，可以一直慶祝相識10年、20年、30年、40年……(wah長生不老…，哈…開始眼瞓，亂寫喇……)，最後想講的都係o個句：「好高興識到大家」。

已經好累了x_x，開始失去意識……睇唔到字喇，下次再寫過……

附加豬今日早上活動：

 講翻今日仲做過乜先。今日放假無乜好做，就約左朋友Ｉvan上黎屋企煉習。煉習乜?當然係對打啦，哈哈。好多人聽到都覺得奇怪，o係屋企打拳?無錯，係得ga。只要執好個廳就夠位ga喇，雖然唔可以起540 jump turning kick，360都仲夠位....哈哈。

　　Ivan d 功夫又好左，技巧好左好多，出手又快，好難對付。佢學的係中國武術，我學的係......總之o羊都學d......好聽d 叫 MMA啦(但無學地戰law)。打左一輪又之後，不分勝負。大家學的唔同，好難講邊個勁d ga，亦無必要分啦，大家互相學習、進步ma。打完一日雖然好累，但感覺好好。