咖哩雞 again~

本大人又整咖哩雞喇，哈哈~~

可能因為同 michelle 大人食左一餐的關係，星期六突然好想整咖哩雞。因為話過要整d 好食ge野出黎，但到而家都未整過，所以都係時候出手喇~~

個樣似啦，睇住先啦~ ^_^

材料：都係果d 啦~~

不過今次特別d，加左雞湯同蕃茄。

加蕃茄落咖哩係跟高圓寺師父的對手，唔知乜名學的。

因為學翻正確的握刀手法，所以刀法進步左，準備料都快左好多。

少下d洋蔥咁啦...

唉，原本都幾好，但去到少完d料再炒d雞就有d問題，個爐d火好弱，唔夠氣，死氣沉沉的。一向都知ga喇，但真係煮落就知唔得，師父家的爐，火好大好猛，好有氣勢，我家的就總是死死的(似我^_^')。

煮到中段有d唔對路，包咖哩醬有d古怪，味有d唔同，色又唔順眼....同我用開的一包有好大分別。原本諗試下新野ma，點知有d出入.....唔諗咁多喇，即時加埋d配料調味。都係魚露，雞湯，糖之類啦.....最後加埋蕃茄，完成。

今次唔算失敗，不過唔夠味，重點係錯手加左好多蕃茄!! 哈，碟咖哩雞變左紅紅的。媽唔食得咁辣，所以在我回家後，碟雞俾人做手腳，加左水........而家味道似咖哩味的蕃茄薯仔湯.......哈哈

原本認為今次都見得下人啦，可以請朋友仔試啦，最後都係決定放棄，下次再請啦。要做到完成度再高先有信心呀，因為我d 朋友仔都係識食之人，好煩ga~~唔好食佢地實好多野講。我要佢地試完之後唔再想食出面d 咖哩，就好似我只係中意食師父煮的咖哩一樣。唉，點整都唔夠師父一半咁好，師父又唔肯翻黎煮一次俾我睇......

下次啦，努力靠自己煮多幾次!!

諗諗下不如落毒算喇，話唔好食唔俾解藥......應該唔敢亂講野~~哈哈。