呵呵! 大家一睇標題,係咪一頭霧水呢? 乜野叫"秘官"? (唔係便秘呀!)大家一路睇就會知喇!

剛過去既星期日,我同少爺由鄉下去咗中環食野.事緣少爺睇生果日報介紹咗間新開既星加坡餐廳Shiok,想同我試吓(佢知我鍾意食"架央多"麻)

一睇呢間Shiok Restaurant + Bar既門面,就知係玩型格野?! 好唔好食架?!

睇到街外景都幾舒服既,店內客人以外國人同中環型人為主,肥嘟嘟既店主亦係唔多識中文既Singaporean?!

唔睇唔知......原來Shiok代表超yummy勁好食?!

"You won't be disappointed!"講到咁........我就真係要"抹定咀"試真d,睇吓您係咪真係咁掂?!

點完菜之後,waitress話約20分鐘左右先有野食,ok! 點知等咗成30分鐘有多先有第一樣野黎........ 

Singapore Redish Cake (Black),即係炒蘿蔔糕加勁多甜豉油,份量細細,不過幾惹味味道唔錯!

少爺要既Singapore Minced Pork Tossed Noodle,睇落似有齊豬肉片.豬肝.魚蛋既雜錦粗麵? 我問少爺味道點? 佢話食材無乜特別,最正係個微辣既喇沙醬汁(響麵底)

少爺食完成碗麵咁濟(我地坐咗接近50分鐘),都仲未有第三樣黎?您究竟漏單定點呀?!

結果我地催咗兩次,先黎埋杯星加坡特色咖啡(咖啡都要整50分鐘?)同Singapore Minced Pork w Beancurd Skin Roll!

呢個春卷味道幾惹味架! 不過係勁勁勁多油! (多到一夾起已經滴咗兩滴油響碟) 希望廚師下次搵隔油紙"吸兩吸"先攞出黎呀!

之後再等......再催......再等.......先黎埋呢個Singapore Stewed Mixed Vegetable,呢煲野都好普通吓,大家去可以唔使試呀!

我呢碗Singapore Wanton Tossed Noodle 由一坐低"落單"到上枱用咗85分鐘,前後催咗3次,真係.......未食先火滾!

但係平心而論,呢碗野味道係相當唔錯既! 叉燒同炸雲吞都ok,最正亦都係個喇沙湯底!

最後黎既Kaya Toast,似斑蘭多士多d? 究竟星加坡既傳統"架央多"係咪咁?

當我同少爺食緊呢個Kaya Toast時.......

小妹(忍唔住又黎料): 哼哼哼! 呢間鋪頭自己講到咁勁! 又講乜野唔會失望?! 要咗7樣野,有5樣野要催(隔離枱情況都係咁)我"秘密飲食判官"(簡稱"秘官")一定要同blog友講吓..........

仲有,佢既食物.價錢都ok既(呢餐$250),不過速度.同服務態度都好唔掂呀!(除咗店主好好笑容外,樓上既一男一女職員都係一副愛理不理既樣)唔改善都唔使旨意我再黎!

少爺(又俾佢中point): 最詭秘既係.......整咗咁耐既多士,竟然係唔熱既?!

就係咁,我地就響呢度食足2個鐘(仲耐過早兩晚食浪漫大餐)先離開,再行吓街喇!

呵呵! 呢個shark袋好得意喎?!

仲見到Chocolate Rain既鋪頭呀! 平日只係響CitySuper見佢既野,唔知原來基地響中環?!

我好鍾意呢個冬菇頭髮型呀!

呵呵! 我見佢既插畫袋好靚!不過$280一個布袋唔多抵喎?! 點知少爺話........鍾意就買喇! 佢送俾我? 咁點好意思呀? 多謝哂喎!

買完個袋想走先見到,店主好鬼祟咁放咗張75折coupon(買滿$250可用)響門口地下,我同其他2個客人都完全睇唔到,俾咗正價! 攪錯呀? 有心減價就唔好咁鬼祟喇! 大家去買野時一定要留意呀! (少爺蝕咗$70呀!)

呃咗少爺個袋同lunch,我決定請佢去旺角食吓新開甜品"甜品革命"......呢間野雜誌宣傳稿好勁呀! 幾乎本本雜誌都寫過,等我"秘官"又黎評吓先.........

少爺要咗榛子朱古力忌簾麵包布甸,我就要咗日本栗子朱古力軟餅,兩款都係配曲奇妙趣雪糕既

呢間野所有甜品都係三十零蚊,味道都唔錯既,起碼賣相都懶似酒店款(佢既主廚係前五星酒店餅師).

我地邊食我又邊"發up瘋"......

小妹(扮勁扮到自以為自己係噹san): 價錢味道都可以接受! 不過環境地方同店員醒目度就好有改善! 您睇,我最憎鋪頭用膠門簾,人人行入黎都要用手拉開,好污穢呀! 仲有呀! 果個帶位伙計好唔掂呀! 頭先門口有2pair人"裝吓裝吓",佢都唔乘機介紹"拉吓客"?! (果陣得兩枱客,佢悶到響度睇雜誌)如果佢落力介紹吓,人地好大機會會入黎試吓! 鋪頭生意好,自己都好麻!

少爺(懶有見地): 十幾二十歲靚仔邊會咁識諗?! 喂!我好飽呀! (佢份甜品只係食咗一半唔夠!) 您食埋去呀!

小妹(好奇怪): 您食唔落又叫一份? (少爺怕食甜野,所以平日我地多數share一份)

少爺(陰陰咀笑): 呵呵! 我見您俾錢,咪死唔蝕底,食唔哂都叫多份囉!

小妹(媽媽聲): 您條cheap精! 我都估到您係咁喇!

呵呵! 大家睇完,覺得我咁多"聲氣",係咪好有資格做"秘官"呢?!

同場加映:

哼哼哼! blog 界真係多"好人"呀! 我以前睇某d"有錢人"既blog,俾人誤導咗呀! 

前一篇講過既Park Lane Hotel 頂樓餐廳Riva,"某人"之前介紹過幾次,都話好掂好正! 點解我果晚食咁唔ok?!

頭先"某人"同我講,係因為佢同Riva餐廳好熟(佢係有錢熟客),所以先可以特別安排有"好野食"......平日呢間餐廳水準好唔掂,我地呢d平民百姓join咗會籍,只會食到水準"勁麻麻"既菜式,變成"超級大笨蛋"?!

"某人",您真係好blog友呀! 又唔響blog度講清楚,誤導大家,以為佢地好掂!

哼哼! 我要俾3個劣劣劣您呀!

各位朋友,您地千祈唔好好似我"咁天真",俾人呃呀!