豬友飯局 - 2009年7月 (大自然素食＠銅鑼灣)

今個月（即七月）本來食泰國菜，但豬女响五日之前腸胃炎，假果食泰國菜咁刺激的食物，好似有o的過份，所以決定食得清清地。打死都唔食齋的豬朋友，今次竟然讓步。 加上豬女之前聽小方講過，「大自然素食」o的野食都幾特別，味道都唔錯，所以決定去試吓健康的fusion菜。

豬朋友去食飯之前，一直在討論，齋都係由豆腐、麵筋、蒟蒻之類製造，食唔飽架！而且返工之前已經「打定底」，怕肚餓食唔飽咁話。點知大家見到個Menu點餸時，大家好似忘記咗今日係食齋，睇到過Menu寫住豬、牛、羊、鴨、魚生之類的食物，唔知點解瘋狂地點菜，而且仲話「o的牛好似幾好味咁?」  呢o的咪叫做「齋口唔齋心」o羅！

食飯之前，曾經去過open rice做資料搜集，睇吓comment，例如串燒，壽司似等都係必叫之選。

豬友擔心唔好味，所以先叫咗二、三道菜試吓先：

1) 羊肉串
口感勁似真羊肉，加上沙爹汁，以為自己食緊肉，豬友一致話「正」！

食完之後，大家立即o羅起個Menu狂點菜。

2) 魚生拼盤
分別為吞拿魚、鮑魚及三文魚三款。仿真度相當高，吞拿魚及三文魚是半透明狀，但味道就一般，進食時覺得有少少「出水」。

3) 軟殼蟹壽司
聽聞壽司幾好味，所以叫咗一客試吓。味道一般，但嫌佢o的餸（即軟殼蟹）唔夠多。

4) 避風塘一口茄子
一個字「正!」，炒得夠「穫氣」，勁似去咗食大排檔小炒，茄子炸得唔油膩，鋪面的辣椒夠多，其中一位豬友用來「送飯」。

5) 芥末牛扒
中日「合壁」的餸菜，豬友見到牛肉，即刻話要試。但覺得o的仿牛肉口感好似「霉霉地」，而且有少許怪味，我地bad list咗佢!

6) 乳豬配掛包
响open rice見到食評唔錯，賣相相當吸引，所以叫咗一客試吓。個包皮幾好味，但o的仿鴨肉略為乾咗少少，其實味道係唔錯，不仿一試。

7) 金瓜炒飯
豬朋友話唔夠飽，加單叫咗個金瓜炒飯。（點知個飯未到就食飽咗）
所謂金瓜，即係指南瓜。唔好睇佢咁細個，食起上o黎都幾大架！炒飯好香，又有南瓜味，個瓜夠「淋」，甚至可以拆個瓜食，不過我地太飽，只好食晒o個飯，放棄個瓜。

見open rice推介，原本想叫一客芒果製壽司試o下，點知食完個金瓜炒飯都飽咗，唯有下次先食。

整體而言，對於我地食開肉的人．間中食吓齋都係唔錯的選擇。而且價錢都OK，我地叫咁多野食，大約$100／人左右，連豬朋友都話要帶屋企人去食，貪佢連老人家都食得。不過要留意，好多食物都以煎炸為主，都係「香口」野，如果怕「熱氣」，就要响點餸時留意一下。

另外，聽聞話銅鑼灣分店的食物質素及裝潢，都比太子分店好，原來選擇地點都係一個重要因素。