豬友飯局 - 2009年6月 (銀杏館)

今個月（即六月）豬朋友們話唔想再食牛肉，最後搵咗一間位於中區的意大利餐廳，名叫銀杏館。

裝潢是較為舊式的西餐廳格局，而且全部waiter都係年長的伯伯，佢地好好人架，又有禮貌招呼我地。食完之後返屋企再去睇佢地個web site，原來餐廳裡的員工，
全都是退休人士，部份員工的學歷都好高，除了懂四國語言，甚至有部份係專業人士，佢地都好敬業樂業，所以話千其唔好「睇小」（小看）o的長者呀！

言歸正傳，四個人點咗二個小食，二個Main Course，一個炒飯，一個意粉，以四個人計算，我地都幾大食架！

1) 等食時的香草包及芝士條
     香草包加橄欖油及黑醋好味道，芝士條夠芝士味，正！

2) 小食類:
     - 白酒煮全殼藍青口

 sources味道唔錯，但青口唔新鮮，有o的失望。

 - 香煎法國鴨肝　伴田圖甜醋汁

鴨肝要熱食，入口即溶，味道就一般，四個人share食，唔駛咁「膩」。

3) Main Course:

   - 燒美國安格斯肉眼　伴焗甜薯雜菜配紅酒汁：

    豬朋友不可不點的食品，牛都幾新鮮，豬就認為牛太膩，不過味道都OK架！

 - 煎澳洲穀飼禾羊鞍　伴薯蓉焗茄子配迷迭香紅酒汁

令人有驚喜的主菜，羊鞍新鮮，又夠肉汁，煮完o的羊都唔覺得「蘇」，味道very Good，豬推介食品。

4) 飯類
     - 海鮮意大利炒飯

海鮮夠多，唔知點解海鮮飯裡的青口，比之前叫的白酒煮青口新鮮。大蝦又夠大隻。可能我地凍凍地先食個飯，覺得件三文魚有o的「腥」，最喜歡個sources，容易送飯。不過豬一向對意大利飯都係麻麻。

5) 意粉類：
     - 煎夏威夷帶子雜菌墨汁意粉

豬稱呼為「電線意粉」。味道就……唔記得咗，印象中係幾好，其他就唔記得。

最後，埋單時waiter伯伯問我地係唔係會員， 我地第一次來當然唔係啦！然後俾咗幾張form俾我地，話下次去食會有九折。如果生日當日去幫襯，會送神秘禮品。

順帶一提，他們所收的小費，全部都會用作慈善用途 (以長者服務為主)，例如今年農曆新年，她們親手做年糕送去老人院的長者。

所以豬話，不論有冇折，以食物的味道，以及他們的行善的心，都已經值得去「多多幫襯」啦!當晚(星期五晚)，全場都坐無虛席，客人當中有不少白領及西人。如果要去試試，建議預先訂位。另外，請不可遲到，逾時不候。

銀杏館網站：
http://www.eldershop.com/gingko/