感恩處處~阿b出世喇!!!

預產期的今天，bb已經出左世兩星期了！宜家趁bb瞓左覺，自己又有dd精神，等我喇喇聲update下我地o既近況先！

就係o係兩星期前的星期日凌晨五點幾，我如常起身去vv，之後個肚開始有d唔妥，我還以為想攪肚痛，但係大小都去晒，仍然覺得有小小肚痛…於是我坐在床上休息，一直等左半小時，個肚仍然攪肚痛，我唯有叫醒老公，同佢講，我有dd肚痛，但係可能係假陣痛，因為痛得不太有規律。

老公幫我計時，原來差不多五、六分鐘輕微痛一痛，我地都係覺得入院check下安全d，我先去沖涼，食了幾塊餅乾，再pack少少野，打左個電話俾媽咪，老公就車我去入院，我重sms陳牧師，講唔知係咪真係陣痛，要入院了。當時係早上7點幾，我地原先重想先去食早餐，但係之後慢慢痛重左，每次一痛約維持30秒。

我地到達仁安醫院時間約8點，姑娘摸個肚就話，我係有宮縮，佢想幫我check開左幾多度，但係我實在太緊張，佢無辦法check到，佢話陳醫生剛o係醫院做緊野，咁叫佢過來，等佢check喇！

陳醫生好快就到左，佢幫我check完後，就講要替我穿水，我不斷掙扎，大叫唔好(好肉酸)，我重見到一支白色o既刑具，個心好驚，因為o個陣我重疑惑緊，我係咪真係生得？一穿左水，好似水喉開水咁，沖左好多水出黎，好尷尬，我聽到陳醫生講要幫我吊支水。

我被推左去待產室，身上有胎心機同埋度宮縮的儀器，痛係多左，但都頂得住，姑娘幫我check，佢話我開左四度。老公為我買來的三文治，因為姑娘唔俾我食，所以變左做老公o既早餐(有d後悔先頭無忍住痛去食早餐)，姑娘重叫老公幫我pack走對拖鞋，重話我生之前都無需要落床了(聽到無得落床，個心又有d緊張)。

跟住，有個姑娘推左一包摧生藥同埋一包鹽水野入來要同我吊，我問姑娘點解咁快要吊摧生藥？我想等一陣先，因為我真係覺得一切都來得太快，想適應下d痛…姑娘無得揸主意，唯有叫陳醫生入來睇我，我問醫生好多個點解，醫生都被我激親(好對唔住，陳醫生！我當時真係好多個唔知點算，我係一個好想睇清前路係點，先會去行的人，所以好多時都會問點解要咁。)周旋了一輪，陳醫生很溫柔地講，“你要信我地，我係醫生，我知道做d咩係為你好，等我幫你打呢支針喇！”我唯有乖乖地被醫生在左手上插了那支針。接住我也打了一支止痛針，再加上聞笑氣，真係有小小wing wing地。

不久，痛多左，又痛密左，但都可以頂得住，我無叫，只係痛到好似粒蝦米咁，姑娘叫我唔好屈曲對腳，但係真係好痛，我control唔到，係咁屈曲對腳"典來典去"。隔左一陣，開始feel到子宮想push阿b出黎，姑娘一check，原來已開左八度，就話入得產房。我重記得產房個room名叫做Eden，心裡只有求神保守。當時的我係好眼瞓，唔係好知自己要做d咩，旁邊老公不停叫我加油，我只係follow姑娘叫我用力同閉氣，無耐，大概push左七、八下，再加上剪陰同埋吸管，阿b就出左世喇！我聽到佢喊，可能我真係吸左太多笑氣，覺得好似好唔真實咁。所以就o係影一家三口照時，我都唔係好識笑……

之後，我被推入觀察室，陳醫生再來看我時，我已經清醒晒，佢重同我傾左好耐計，講左好多屬靈的道理，我真係好感謝天父，安排左一個醫人醫靈的好醫生給我。多謝晒！天父、陳醫生、還有所有為我地祈禱的弟兄姊妹......我深知道，我之可以由入院到生b都只係用左3個半小時，完全都係神的恩典，那更讓我確信“我的恩典夠你用”這句話！

(謝謝爸媽為我預備了雞飯給我住院時吃！)

感恩事項：

1.      作動時有老公陪伴入院。

2.      平安而快快趣生b。

3.      陳醫生不斷的鼓勵，她準確地control每一個產程時間。

4.      bb一切健康正常，比預產期早兩星期出世，出世時有7.3磅。

5.      爸媽經常來探我，及幫我做家務，為bb預備整潔的家。

6.      我住的2人房，有3日都係只有我一個人，可以好好休息。

7.      臨出院時，認識了剛入院的同房，她餵了兩年母乳，我倆交換了手提，她說有什麼餵母乳問題，可隨時電她。

8.      替我洗吹頭的師傅，原來都係Christian，我地傾了很多屬靈的事，她說我的生b見證可以鼓勵她姐姐。

9.      我生b當日的靈修經文，正正是哈拿求子的故事，作者所講的見證，也與我有很多共通之處。我深深感受到原來阿b的出世日期，一早已經預定了，他早了兩星期出世，不是因為我在前一天行得太累，而是神一早己有計劃地預備好了。

(終於可以瞓下自己張床仔喇！)

(阿b：我要食奶奶喇！下次媽咪得閒先慢慢回覆大家同update個blog喇~)