兩天

星期六
上年去完書展之後, 本來諗住唔會再去, 因為實在太攰喇! 到咗今年, 掙扎完一輪之後, 都係決定再去. 理由都幾...... 低能, 當減肥~~ 九點出門口, 十點半落車開始行, 一路到接近4點先離開. 行出會展個刻, 見到去旺角小巴, 諗都唔諗即刻上車! 其實行番出灣仔警處應該有巴士直接番到屋企, 不過我條腰已經負荷唔到行去巴士站喇, 要即刻坐低, 情願出旺角轉車. 同老公兩個完全輕便裝束上陣, Tee + 運動褲 + crocs, 果然冇咁辛苦, 著crocs對腳真係冇咁攰, 舊年著波鞋行唔夠兩個鐘腳底已經開始痛喇! 今年入場又冇咁辛苦, 雖然我地咁早去, 但因為唔想去到再排餐死買飛, 所以之前已經買定$25飛. 而且今年冇咁多鐵馬蛇餅, 實在太好了!

除咗狄娜本"從母到友"一路都見唔到, 預定要買的都買了. 冇預計要買嘅都買埋, 就係村上春春喇, 已經想買春春嘅"聽風的歌"好耐, 不過一係去到書局就唔記得, 一係就搵唔到, 今次終於畀我買到了, 仲有"神的孩子在跳舞"係以前冇見過嘅, 同埋本"波特貝羅女巫"都有7折.

最可惜係去唔到杜如風個簽名會! 冇辦法啦, 星期日一早已經買定飛睇戲. 近年除咗吳三姑之外, 杜如風係我唯一欣賞嘅, 真係想見佢一面呢!

上到小巴, 老公突然發現...... 我一本cookbook都冇買! 值得買嘅我已經買咗, 新出嘅又冇咩好買喎, 可以慳番~

其實今年係比上年多好多人, 我覺仲多人過行年宵呀. 如果你係一個斯文人, 咁應該唔係點行到埋去揀書. 所有地方都塞滿人, 禮讓... 係冇可能嘅, 只可以講聲唔該, 再強行咁迫過! 番到屋企, 好似同人打咗好多場交咁, 加上入面嘅食物非常難食, 個豬扒包我咬兩淡已經頂唔順放棄. 咁呢一日... 如果當減肥, 都可以話係成功! 哈哈~~

星期日
因為太攰嘅關係, 夜晚反而唔係訓得幾好, 但係星期日又出去飲茶睇戲. 如果冇買飛, 我真係會放棄. 飲完茶未夠鐘, 係尖沙咀周圍行, 去crabtree買咗我想買好耐嘅爽身粉, 有玫瑰花淡淡嘅香味, 正呀! 通常我入一間舖頭, 都係有目標的, 買完想買嘅野就即閃. 我唔會走去樣樣都睇下, 因為我其實唔鍾意行街. 係crabtree都一樣, 我同sales講完我想要咩, 就想畀錢走人, 但係...... 個sales不斷同我講 "小姐, 買滿幾多錢有咩咩送喎...... 小姐, 呢樣咩咩咩做緊promo喎...... 小姐, 呢樣咩咩咩淨係得我地呢間舖有喎...... ", 隨住我不斷咁同佢講"唔洗\唔需要喇\冇興趣\唔o岩用", 佢嘅笑容就不斷咁減少, 到最後變成黑面. 我知錯喇, 我唔應該要你笑咁耐, 浪費咁多口水, 下次我會一開始就同你講 "我只係夠錢買支爽身粉架咋!", 咁大家都好做嘛.

入場前我已經同老公講如果我訓著的話, 唔好叫醒我. 近幾年我入親戲院都忍唔住訓著, 除咗睇哈利波特, 呢日攰到想死, 而且我並唔鍾意睇蝙蝠俠, 只係陪老公睇, 有理由相信我一定會訓著. 正當我雖然冇合埋眼, 但已經進入昏昏沈沈嘅狀態時, 突然有兩隻字傳入我耳中. 回魂之後就見到陳冠希喇, 都未望得真, 陳冠希已經消失得無影無蹤...... 之後我就冇再神遊喇, 不過唔係為咗睇下仲見唔見陳冠希, 只係我打起精神睇埋落去, 真真正正咁陪老公睇場戲. 咁...... 究竟傳入我耳中個兩隻字係咩字呢? 睇完之後我終於醒番起, 係老公細細聲係我耳邊講"香港"兩隻字. 果然係香港是我家, 一聽見就回魂喇.