無題

已經好耐冇理過個blog喇, 冇意欲去理, 亦都唔想理. 去完日本之後, 似乎都未停過, 要大掃除啦, 準備過年啦, 又有好多野要諗, 又病咗幾日. 衝完一輪之後, 個人就好似洩咗氣咁, 所有野都停低, 唔想做唔想諗, 所以亦都冇咩可以寫. 另外亦都因為一句說話, 令到我有少少鬥氣心態, 唔想寫.

最近阿嬌出番黎, 令我有幾大感覺. 記得初初報紙登相個陣, 我覺得張相係移花接木多, 到越登越多, 知道係真喇. 我只係諗, 慘喇! 咩都畀人睇哂, 最私密嘅野都畀全世界人睇哂, 以後點算呢? 但好多人都話佢係"偽人", 我唔明點解要咁極端, 初初我唔信d相係真, 因為阿嬌畀人嘅感覺唔係咁. 但... 佢係一個藝人, 係show business, 冇必要將真正嘅自己表露丫. 就算普通人都唔會將自己嘅性生活同朋友分享, 唔通阿嬌做訪問時要話 "係呀! 我平時都會影下呢種相呀!". 何況每個人心入面, 都總有事係唔願意同人分享, 唔想人知. 咁究竟呢幾個女仔有咩需要道歉呢? 道歉嘅唔應該係將人地私隱公諸於世嘅人咩? 點解受害人仲要受盡千夫所指呢?

張柏芝同阿嬌都接受訪問, 但係大家又會將兩個訪問去比較, 其實點可以比呢? 每個人都有自己嘅感受, 而且張柏芝勇於表達自己, 阿嬌就算想表達自己都未必表達到. 兩個都係廿幾歲女仔, 都係受害人, 點解唔可以公平d? 有傳媒一年不停咁寫, 寫到有咁衰得咁衰, 就算有幾大仇口, 都唔需要咁丫, 如果真係因為咁而害咗人地一生, 又點過意得去呢?

世界真的亂......