終極肥霸

哈哈~ 今次好成功呀~~ 呢個chocolate cream cheese muffin簡直係終極肥霸呀~~
之前用個muffin recipe係用植物油, 點都係唔夠用牛油咁鬆同香, 所以今次轉咗個用牛油嘅recipe. 睇佢外表平平凡凡, 其實好有內涵架. 放大睇下就知喇......

入面有cream cheese餡同chocolate chips, 加埋出面嘅牛油muffin, 仲唔係終極肥霸?? 食前叮20秒, 咁入面嘅cream cheese餡就會溶溶地, 一口咬落去, 超香濃呀~~ (仲會諗起好肥呀好肥呀) 所以...... 我只會食一個, 其餘嘅畀哂大哥! 害人之物... kakakakakakaka~~

餡料:
忌廉芝士　　250克
砂糖　　　　50克
蛋　　　　　半隻
朱古力粒粒　80g

1. 忌廉芝士室溫放軟.
2. 忌廉芝士加糖打軟, 加蛋汁打勻.
3. 加入朱古力粒粒拌勻, 備用.

muffin:
無鹽牛油　110克
砂糖　　　60克
三溫糖　　60克
蛋　　　　1.5隻
雲呢拿油　少許
牛奶　　　40毫升
低筋麵粉　115克
可可粉　　25克
發粉　　　1茶匙
杏仁粉　　20克
鹽　　　　少許

1. 牛油室溫放軟. 麵粉, 可可粉, 發粉混合過篩.
2. 牛油加砂糖和鹽打至鬆軟, 帶淡黃色.
3. 加入三溫糖打勻.
4. 逐少加入蛋汁和雲呢拿油打勻.
5. 加入牛奶打勻.
6. 加入杏仁粉拌勻.
7. 加入混合已過篩粉類拌勻.
8. 紙杯中少加入少許muffin麵糊, 再加入一匙芝士餡料, 再用muffin麵糊覆蓋.
9. 180度焗25-30分鐘.

* 芝士餡料份量可能較多, 唔想浪費的話, 可以將muffin材料除3乘4, 加大muffin麵糊份量, 應剛好可以用哂全部材料. 細紙杯做到15個份量, 但芝士餡料有剩.