美酒佳餚+上環一日遊

今日(11月1日)星期日, 早上同6299飲完茶, 就出發去西九龍的美酒佳餚節逛下~

下午2點幾到達, 已經見到有人走(因為1點才開始), 心諗唔通真係冇乜野行? 不過唔理啦~ 反正唔洗入場費~

到達時, 好熱呀~~ 又話冷峰到既? (原來係今晚先到....)
我老公本來想飲返2杯, 但係我又唔like飲酒, 買左d品酒卷, 唔通12張佢一個人飲晒咩, 實醉到返唔到屋企! 而且近年都唔想佢飲咁多酒, 驚佢有痛風呀~

於是我地就專攻野食啦~
估唔到, 一d都冇欺場喎~~
我地食左m4牛柳粒蒜片, 非常好食~ 軟淋的肉粒, 濃郁的牛味, 再加上連d蒜片都整到好好食~ 呢30蚊, 抵呀!! (一兜起碼有8舊呢!)
之後食左d新鮮鮑魚, 不過我同老公都覺得麻麻地啦~
一路行一路搵好野食~ 黎到一檔賣日本和牛串燒, 一串40蚊, 有3大粒(1粒size比麻將大一半), 燒到約7成熟~ 又係好軟淋同充滿牛味啊~~ 呢個牛味比剛才的牛柳粒更濃多少少, 而家諗返起都流口水呀~~~ 呢40蚊, 好值!!!

中途發生左一件少少唔開心既事, 事緣我聽到有一檔係度大聲叫話免費試酒, 咁我咪行埋去囉, 但我企左係度好耐, d人都唔理我, 剩係係我身邊大叫免費試酒, 我其實想試架, 不過又唔知邊隻好d, 諗住等佢介紹(因為見佢之前同之後都有同其他人介紹), 但等左好耐都唔理我, 我就算囉~
可能佢覺得我個樣睇落唔似試完會買, 就唔理我掛?!

好快就逛左一圈, 準備閃人去上環食九記, 走時睇下錶, 果然真係一個鐘左右就行完呀~~

去到上環, 就沿禧利街到樓梯街再上文武廟拜一拜神先~ 聞說有好多學生哥開學前都會黎拜一拜, 咁我老公係教師, 都算相關, 又黎拜下先啦~

之後就沿住荷李活道走一小段至城皇街向下走(一條好短但好斜的斜路! 好彩係向下行...) 轉右就係歌賦街, 九記就係位於歌賦街中間~
可惜~~ 出門前唔記得check佢的營業時間, 原來星期日及公眾假期係休息架~~ 緣慳一面, 唯有留待下次囉~

然後, 我地就慢慢向下行, 諗住行到去地鐵站就搭車去天后食華姐清湯腩~
行行下, 見到蓮香既招牌~ oh~~ 原來大名鼎鼎的蓮香居原來係呢度啊~~
見到佢牆外的焗魚腸圖片, 真係好想入去食下~ 不過一睇時間, 原來已經差唔多5點, 食晚飯又未到時間, 食點心又應該已經賣晒..... 認真尷尬~
於是我地就係地下既餅部買左d棋子餅, 2個酥餅, 一包炒米餅~ oh~~ d酥餅真係好鬆脆酥化, d蓮蓉好香好好味哦~~ 我個人比較鐘意黃蓮蓉~~ 味道濃好多~
我同老公講, 出年要黎蓮香買返盒月餅先~ (聞說佢d月餅好出名架~)

之後我地2個又蕩下蕩下咁行, 行行下忽然望到半山自動扶梯~
老實講, 佢整好咁耐, 我地一次都未搭過, 既然一場黎到, 又冇乜野做, 就搭下啦~
我地一路搭一路望, 又影下相~ 途中仲比我見到許鞍華拍緊戲呀~ 仲有周慧敏呢~~ 不過我唔好意思走埋去合照呀~~

一路搭一路搭, 原來, 條扶手電梯真係好x長呀!!!!!!!! 長到我地搭到後尾, 勁擔心返轉頭時點算!(因為冇向下麻) 要行返落去? 我地搭上黎都覺得攰, 行返落去應該行到腳跛!
後尾諗, 上到半山, 冇奶油冇巴士之類可以搭返落山既~~ (希望啦~)
搭呀搭, 搭呀搭~ 終於望到終點啦~~~~~~~
最感動係, 果然就係終點旁邊, 就有架綠色小巴3號, 係返返去香港站架~ ps, 仲要我地係途中見到一部機, 寫住用8達通o都一下, 之後係香港站or上環站搭mtr可以減2蚊~~
真係good fit呀~~
btw, 我見到係扶手梯的終點度有張地圖, 沿左手邊一路向下行, 最終可以行到去山頂纜車站, 途中會經過香港動植物公園呢(話時話, 我n年冇去過了~ 下次搵個時間同老公去行下先~)

之後我地就搭小巴($2.7)返到去香港站, 就搭東涌線轉西鐵返元朗了~
返到元朗之後, 就去新元中買野, 順便係樓下間"噢嬋"度試下佢部腳部按摩機~ 爽呀~~~

然後, 就結束左我地呢一日, 好隨意, 冇乜目的地既一日遊啦~~

去旅遊, 真係咁樣最爽, 冇目的地, 冇時間限制, 冇人吹, 冇人趕, 鐘意行邊就行邊, 鐘意幾時停就幾時停, 自由隨興~ 咁先係人生嘛~~