你快樂嗎?

都有成個幾月冇見老豆, 尋晚響屋企等開餐時, 佢突然出現, 我同細佬當然又再一次開心到飛撲埋去不停錫錫錫啦!

食完飯之後, 兩位大人帶我地去街街, 原來係佢地去一間位於一條大坑渠旁邊, 好出名o既舖頭食甜品(響大坑渠旁邊食甜品???? 好反高潮喎....!).

難得老豆留低過夜, 我就當然唔蝕抵, 成晚黐住佢訓, 一覺到天光, 佢仲同我地一齊食埋早餐、去埋公園玩至走添!

照計, 我應該覺得好開心滿足, 但實情係....我唔開心.

因為, 老豆佢成晚除左話好眼訓之外就冇乜講野, 個樣又心事重重咁, 做乜都提唔起勁, 我覺得佢唔開心. 係佢因為近期太忙? 還是另有原因....

老豆, 如果你只係因為近期有太多事要忙要煩而令你心情鬱悶, 你倒不如專心做好你手頭上o既野先, 到你真係得閒D、心情好D, 至長途跋涉黎探我地囉. 如果係因為其他原因, 我地都會明白ga, 勉強冇幸福呀嘛....!

總之, 我地同爸爸一樣, 只想你開心.