"爸爸囉...!"

明白唔等如接受, 諒解唔等如包容.

以上兩句說話正正係細佬宜家o既寫照.

自從黎左契爺度住, 細佬就比以前更反叛、更孤僻, 晚晚都寧願響大門口唔番房. 起初我以為佢唔習慣契爺屋企, 又掛住老豆, 所以發下脾氣, 但後來我發覺, 佢係因為嬲爸爸, 所以故意激佢.

我明白細佬一定會特別掛住老豆, 因為佢同老豆親厚D, 一向去街街都係老豆拖住佢, 晉仔呢個名都係老豆改o既, 而且, 細佬一直以黎都記住細個時爸爸打過我地一次, 我仲記得果次我同細佬又趁冇人響屋企, 就夾手夾腳將塊紙尿布咬個粉碎, 搞到成個廳雪花紛飛, 到爸爸放工番黎一見到咁o既情境, 即時嬲到頭頂出煙, 隨手就執起份報紙追住我地黎打, 打左幾下我就驚到縮埋一角, 細佬就好倔強咁望住爸爸, 而爸爸就覺得好內疚, 之後坐左響度嬲自己嬲左成個鐘冇出過聲.

話說回來, 之前聽細佬解釋過今次件事比我聽, 我都覺得爸爸唔岩, 係佢唔長進、 冇出息, 令到個家散左, 但無論如何都唔應該響呢個時候令爸爸更難受, 所以我就捉住佢同佢傾下.

"細佬, 一直以黎最花時間照顧我地o既係邊個?"

"爸爸囉...!"

"同我地去街街從來都唔偷懶, 有時間仲一定會同我地去公園玩o既係邊個?"

"爸爸囉...!"

"細佬, 我明白你心情, 但你覺得發生呢件事, 最唔開心係邊個?"

"hm...爸爸囉...!"

講到呢到, 細佬已經明白我意思.

無論爸爸有幾錯, 但始終係一個好盡心盡力愛護我地o既爸爸, 所以最冇資格怪佢o既就係我同細佬.

爸爸, 我地會乖會生性, 但你都係. 我同細佬宜家有菲太后照顧, 你唔駛再擔心我地, 亦冇得再用我地做藉口, 你要比心機做野, 為我地o既將來而努力.