妹妹 (下編)

上個星期有一晚爸爸比平時夜左同我地落街, 佢可能諗住咁夜應該冇乜人, 所以就同我地去公園比我地跑, 正當爸爸一放繩, 我同晉仔起步之際, 至發現原來亞妹同佢哥哥/姐姐響度玩緊, 我同細佬好自然咁第一時間衝過去, 就響爸爸同我同細佬都以為今次一定大鑊o既時候, 我地竟然冇打交, 連吠都冇吠, 仲一齊玩捉喎!!! 原來"玩"可以將一切恐懼消除, 我地四個仲不知玩得幾開心添...!

爸爸見到呢個場面, 安慰到不得了, 而比我同晉仔吠到開始有D討厭我地o既亞妹老豆, 臉上不耐煩o既表情亦被親切o既笑容取而代之. 兩位家長終於有機會傾兒女經.

亞妹個名叫"妹妹"(Mui Mui), 差唔多8個月大,  樣貌甜美可人(因為似我, 哈哈哈...), 性格熱情開朗(果然似我), 佢亞哥叫Healthy, 都係屬於外向型.咪睇妹妹細細粒, 佢跑起上黎彈下彈下咁好可愛, 佢老豆話有時連佢亞哥都唔夠佢跑.

經過果晚之後, 我地見到妹妹已經再冇好似以前咁狂吠, 但壞習慣呢家野, 唔係話戒就戒, 有時都會忍唔住吠幾聲, 但當係公園遇到o既時候, 就一定一齊玩得好開心. 妹妹同Healthy仲學識搵爸爸餅餅食添!

只可以有呢兩張相見得下人, 因為個個都掛住玩, 冇人啋爸爸!