久別重逢

好耐冇去街街, 之前一個月除左去過契爺屋企一次. 同埋一次Dxxside Cafe (其實我地唔係咁鍾意去呢間野, 因為每次都會遇到D癲狗, D野又麻麻地好食...), 直至前幾日, 終於有得出去玩!

今次去左另一間Cafe (唔係我鍾意飲咖啡, 只係香港冇乜室內地方歡迎寵物), 一入到去, 嘩!!! 乜咁多柴犬ga???

原來今日係一個柴犬聚會, 唔怪得之啦...! 由於兩位父親大人秉承一貫漏氣o既作風, 我地都差唔多係最遲果兩個, 第一時間就梗係睇下有冇靚女啦! 突然見到遠處有個女仔好似唔錯咁, 身段勻稱, 樣貌標致, 當我準備行埋去自我介紹, 再望真D, 好熟口面下喎, 同晉仔成個餅印o既? 佢咪係...三妹!!!!

計落我地都成年冇見啦, 記得當日四兄弟妹, 我同晉仔首先離巢, 之後就失去聯絡, 估唔到今日可以響度見番喎! 雖然大家都好似唔係好認得咁, 但我好記得我地細個果陣, 我成鬼日都認錯佢同晉仔, 佢兩個真係似得好交關!

三妹宜家叫"Ga妹", 有個好靚o既媽咪, Ga妹個樣同晉仔有九成似, 身型比晉仔細D, 最慶幸o既係Ga妹個樣甜D, 冇晉仔咁"苦dell dell" (最近比呢個名詞洗左腦).

可能因為咁耐冇見有D生疏, 又或者係大家都大個左, 所以冇再好似細個時咁追黎追去, 但我地仍然都有一種好親切o既感覺, 呢D就係所謂o既血濃於水卦...!

分唔分得出晉仔同Ga妹呢...?

呢日真係玩得好開心, 除左見番三妹, 仲識左好多新朋友. 有久仰大名o既恣悠 (真係好靚女, 大個可以去選美), 全場最細粒o既炳權 (都係靚女), 曾有一面之緣o既小V、冬冬佳佳 (呀! 原來佳佳係我地同父異母o既細佬左ga, 唔怪得同我有幾分似樣, 連性格都似! ), 仲有由頭到尾玩埋一堆o既Sam同木耳, 好有江湖大哥feelo既來福, 斯文o既沙翁, 街坊星仔....等等.

好多謝柴媽介紹我地認識"愛柴同盟", 多謝主持大局o既Heather姐姐, 希望好快又可以同大家一齊玩啦!