好命．婆

第一次聽到呢3個字係十幾年前家姐要結婚, 阿媽話要搵"好命婆"幫家姐梳頭, 而我大姨就係最佳人選, 因為佢:

上有阿爸, 阿媽, 老爺, 奶奶,

有老公, 有家姐, 有阿哥, 有細妹, 有細佬

仲有1個女, 1個仔, 可謂應有盡有, 成家人將佢包圍, 好好保護.

阿姨一直比人感覺係傻大姐, 傻人有傻福, 好似以前米雪做過既媽咪角色咁, 唔會去計算人, 亦好肯幫人, 身邊仲有一大班師奶好友.

好幾年後, 命運改寫, 姨丈因為高血壓係大陸返返下工爆血管, 再加上延誤, 運返香港做左6個月植物人後英年早逝, 40多出頭既阿姨從此成為寡婦.

嫁人後相夫教子既阿姨要獨力照護一對仔女, 慶幸既係, 大女剛好畢業可以減輕家庭負擔, 阿姨重回社會大學, 係醫院工作.

屋企每一個都知阿姨既難過, 但除左金錢上既幫助,又可以為佢做咩呢? 阿姨一生都鍾意打牌, 亦只有打牌先可以令佢好過, 阿姨唔想大家擔心, 表面都裝得若無其事, 但大家都知道阿姨就只有工作, 打牌, 工作, 打牌來麻醉自己.

2001年, 屋企最德高望重既外婆(Irene)因肺癌加中風令全家人疲於奔命, 阿姨因過去照護姨丈既經驗而教識我同家姐點去照顧 Irene, 當大家心情平伏落黎, 先發覺阿姨神情有異, 原來阿姨要做手術, 佢一直冇提起係唔想再加重大家負擔, 最後結果係阿姨不幸得上癌症.

個段日子, 不停兩間醫院兩邊走, 心裡邊冇啍半句, 只可惜命運弄人, Irene最終離大家而去, 而阿姨係面對病魔中再痛失至親. 但阿姨好堅強, 佢從來冇放棄過, 佢將佢過往既壞習慣改哂, 準時食藥, 準時作息, 好好咁生活. 每3個月去覆診一次.

2003年, 好景不常, 癌魔再復發, 阿姨要再做手術, 之後仲接受醫生建議做化療, 成個人蒼老左10年, 唯一慶幸係冇甩頭髮, 副作用不大, 但大家都知佢所受既苦唔少, 只係唔想大家難過, 所以佢從來冇呻過半句. 

近幾年, 阿姨表現好樂觀, 唔想對大家造成任何麻煩, 盡可能都自己搞掂.  我只係想問一句點解咁堅強, 咁樂觀既人要受咁多苦. 點解要佢不停受考驗.

2007年尾, 阿姨要再次入院做手術, 相信癌魔已經全面進攻, 醫生亦表示阿姨只有6個月命, 現階段只係頭痛醫頭, 腳痛醫腳, 可以做既已經唔多, 而大家只係希望阿姨所受既苦可以減至最低.

2008年新年, 我照護左阿姨幾日, 我知佢好辛苦, 但係佢仲不停咁同我講唔該, 因為佢覺得煩到其他人佢好唔好意思, 佢覺得要後輩照護佢好內疚, 佢喊住話自己好無用, 我亦喊住同佢講, 你啱啱做完手術先要人照護, 我喊係以為你痛呀. 我唔想佢覺得自己係一個包袱, 佢已經比好多好多無病無痛既人堅強好多好多.

年中, 阿姨再痛失佢老爺呢位至親, 阿姨佢表現好淡然, 因為佢知道老爺只係比自己先行一步. 

2008年8月23日清晨, 阿姨已經超額完成佢既人生, 唔需要再受任何痛苦, 隨著"鸚鵡"呢個颱風離大家而去, 到另一個國度與姨丈, Irene以及老爺團聚.

阿姨, 仔女已經長大成人, 你唔使再粗心喇, 係你身上我學曉堅強, 樂觀, 好好活在當下同珍惜身邊所有人.

來生有緣再見!