2008 台北之旅 ~ Day 3 (一)

第3日

先返去「福泰桔子酒店」check-in，放底行李就去忠孝復興路既「豚屋」食豬排，呢間野係周杰倫開既，朋友試過話好正，梗要試試既

舖頭門口有隻豬做生招牌，雖然臭臭地，不過好可愛

呢個set係炸蘆筍豬排定食，加幾十蚊台幣就有前菜、飲品同甜品，d黑豚豬排真係好淋，加埋蘆筍就清新d，炸物最怕就係食落去“標”油，而呢到既豬排食落去一d都唔油，真係好好味!

另一個定食係芝士炸豬排

好勁呀! d芝士係咁流，真係好鬼死好味，有陣陣芝士香味，不過如果d芝士濃返d仲好，食埋d沙律菜就又有肉又有菜啦

甜品係芒果雪糕

炸可樂餅係我地入店前職員派既，本身係下次先有得送，不過今次就送比我地食。個餅都ok喎，係用薯仔做既，少少可樂味，唔油

之後係附近周圍行，諗住食小籠包，但去到微風廣場行左一陣仲係好包，所以唯有放棄小籠包，行一陣超市就走。之後去左太平洋 Sogo睇下有無舊同事想買既野，因為 Sogo 都無野好睇，返酒店稍作休息一下。係「豚屋」食得太包，成個下晝都唔洗食野。不過去到酒店附近既「鮮芋仙」買左2碗凍既芋圓

豆腐花芋圓 ~ 好味，用蜜糖沖既糖水好香，唔會太甜，不過略為少左d

嘩! 我碗就正囉! 粉圓蓮子芋圓糖水 ~ 好好味，同樣係蜜糖水，真係同九份既「賴阿婆」無得比，又多又夠凍，食完想再食多碗添......

黃昏時就去左淡水，諗住睇日落，但去到已經落緊lu

旅遊書都有介紹呢間「可口魚丸」，見咁多人食都去試試

我落左好多胡椒粉，真係好好味，d丸好彈牙，一d都唔粉，連湯都飲埋，個湯底同d丸好味過九份既魚丸