日本へ行って来ました！

復活節一連五天O既假期, 我早就响舊年年尾BOOK 好機票 (因為係用MILES 換架~!), 成2個月前BOOK 好旅館, 期待以久O既假期, 轉眼間.................. 又回到寫字樓O既沉悶O既枱面....

今次去日本, 都係响成田空港到著, 然後响東京住咗兩日. 第一日, 係航機上. 因為用MILES 換咗BUSINESS CLASS O既機票, 入咗香港國際機場O既SAKURA LOUNGE. 最特別係有得飲ASAHI生啤. 不過我唔飲酒, 唔關我事.

去到第一天, 到東京新宿O既酒店已經7點幾, 約咗肥仔林O既一個剛到日本留學O既好兄弟食飯. 去咗一間都幾呃錢呃鬼佬O既餐廰度食飯. 第一次俾LONELY PLANET 跣到...... 之後去咗目黑區呢位朋友O既學生寮度參觀, 都幾好吖, 地方都見洗, 又就腳, 涉谷駅轉京王線兩個站就到.  朋友初到日本, 聽佢講佢條船好似好多錢, 實際上都幾克苦. 希望佢學成歸來之日, 就快快地出人頭到啦 (不過睇怕佢都响香港冇咩作為, 因為佢係讀地震架, 香港.... 股市地震就有!之前三級地震D人都大驚小怪....)

今次去日本住的是超豪華O既PARK HYATT TOKYO. 之前我都唔知道原來HYATT 酒店本身都有分級數, 最高係PARK HYATT, 之後係GRAND HYATT, 然後係HYATT REGENCY. 呢間呢.... 我覺得佢O既氣派仲緊要過香港O既PENINSULA, 佢唔係用D 好CLASSIC O既裝修, 反而係好SIMPLE, 但係SIMPLE 得嚟又覺得好高格調. 總之就好啦~!

Park Hyatt 房中的夜景, 中間黑色的, 應該是新宿御苑

第二日早餐只係响新宿站附近O既麥記食咗一個香港冇O既早餐飽, 好甜, 勁耐冇食過甜嘢, 好放縱!

日本m記的早餐 McGriddle

之後去咗上野恩賜公園. 嘩, 雖然D櫻花都散落中, 不過仍然有好多日本人响度花見呀~!而今次亦正式見識到日本人係點樣花見, 就係响櫻樹下坐底, 一邊欣賞櫻花, 一邊傾偈, 一邊食櫻餅 (唔一定係櫻餅, 總之係和菓子啦)... 但係點解咁多著住西裝O既三五成群一齊花見呢? 唔通呢個係公司FUNCTION?! 咁爽?!

上野恩賜公園的櫻花, 滿開~!

園裡有一家五/六貓口, 响度曬太陽, 真舒服~~~~

上野動物園都好多動物睇, 但係通常都係阿媽帶住仔囡嚟, 我同肥仔林有少少怪, 不過係遊客, 冇所謂啦~!D動物响個籠裡面梗係悶到發瘟, 因為見到有D狒狒响度搞笑, 見到兩隻孔雀一齊開屏, 見到獅吼.... 一次過睇哂動物園裡面要睇O既嘢.

行到好攰, 去咗銀座玩具博物館, 想買一個WII, 因為日本實在太平喇~25000YEN~!香港人食水好深!! 不過, 全東京似乎已賣哂!?! 因為秋葉原都冇呀~! 之後去咗一間MOS CAFE, 同一般MOS BURGER 唔同, 因為佢係CAFE, 有SALAD, 有湯, DECENT D 咁啦. 我最愛都係抺茶LATTE, 正~!

於銀座O既大街行, 都係去FANCL 啦, 買MILD CLEANSING OIL 好平, 買咗好多, 夠一年用, HAHA. 之後見到DAILOUYAU~?! 係法國巴黎整OPERA CAKE O既原祖~!! 响銀座有分店?!嘩..... 仲有勁大間TIFFANY, 勁大間HERMES................... 黐線架..... 再會肥仔林好兄弟, 今次食SHABU SHABU 同SUKIYAKI. 我覺得我個SHABU SHABU 好好食, D 牛好入口即溶. 唔算太貴喎~~~~~~~~!! (死啦, 今日係GOOD FRIDAY, 食飽又食肉. 唉.....)

這個是肥仔林, 飽暖思床褥~~

第三日, 早上約咗肥仔林個兄弟响酒店度食早餐, OH, 唔係包埋入房租嗰隻. OK 好味. 不過好搞笑, 呢個世界科技實令人太方便, 冇咗科技, 唔會死, 但係真係好唔方便囉~! 食完早餐之後, 朋友上响我哋房間, 因為我哋要CHECK OUT, 佢入到嚟就大字形咁瞓咗响張床上面, 話好耐都未瞓過咁厚O既床裖,留學生O既生活真係好刻苦呀, 不過佢過得開心就得啦.

執好嘢, CHECK 咗OUT, 同東京講BYE BYE~ 去咗新宿小田急站搭ROMANCE CAR 入小田原先. 見到肥仔林同好兄弟相擁, 之後朋友只係做咗個口形講BYE BYE, 嗰一刻, 我知道佢係好想喊, 就算唔想喊, 都係好哀傷. 人離鄉賤, 仲有雖然佢已經考咗日語一級能力試, 但係佢直言去到日本都係係聽得明3成到, 呢一種文化衝激, 孤苦無依O既心情, 我真係未感受過....

（つづく）