女王の教室

雖然已經大結局咗, 而電視响呢兩日做埋個前傳, 唔知點解故事裡面o既阿久津真矢每鬧學生o既一句說話, 我都覺得佢好似鬧緊我咁.

記得呢個劇响香港播第一集, 都有好多家長投訴, 話故事裡面o既阿久津老師講咗一d太過現實o既說話嚟嚇怕d學生, 又太過悲觀, 太過discourage.  呢d正正係故事結局o既時候教育部對老師o既一d批評.  事實如此, 好多家長都唔願意俾自己o既小朋友聽到呢d現實.  我仲好記得, 响中學o既時候, 行過屋企附近o既一間文具店, 裡面聽到兩個成年人o既對話, 其中一個講咗呢一句:

"以前學校教小朋友唔好講大話, 而家大個就知道唔可以講真話."

呢一句說話, 大概係我第一次覺得"現實"o既存在.   由現實又返去理想, 又理想再返去現實, 浮沉咗好多年. 回到現實令我覺得悲觀, 諗吓理想又覺得好開心. 好似最近搵工, 我一直都希望搵到一份自己鐘意o既工作, 但係其實呢個希望又有幾真實呢??

一路睇女王的教室, 一路覺得俾人鬧, 係到肉但係又有d唔明.  直到琴晚睇咗前傳o既part 1, 聽到由阿久津老師教訓和美時, 就明白哂.  和美升到中學, 因為想响班度搞好個音樂節, 叫d同學一齊諗吓, 又話大家其實係好同學.... 點知佢俾同學話佢虛偽. 佢問阿久津老師佢係咪好虛偽, 老師就咁講:

"你成日都話係為人哋好, 其實你係好自私o既, 你只不過係想人哋跟住你o既意思去做啫...."

如果根據佢呢個理論嚟講, 的確, 世界上所有人都係自私o既.  所以, 如果一個人真係真心咁愛其他人, 就算係佢咩都唔做, 遲早會有一日人哋係會感覺得到. 

佢講o既呢個理論, 唔單只係講人同你o既關係.  對於自己同命運, 同樣都係applicable.  當呢個世界發生o既事同自已所想o既唔一樣, 我往往都係停咗响度, 希望個天會無啦啦第二日就變番好. 不過, 一個人希望自己o既路行成點, 當然可以.  但係, 阿久津老師亦提到入到一間好o既學校, 入到好o既公司, 咁之後又點? 係咪真係可以得到真正o既幸福? 好似我咁? 想入o既公司無哩反應, 我應付危機o既辦法就只係日日响屋企度唔出嚟?? 

"唔該你清醒d啦!!"  可能應該係我今後做人o既座右銘.