Retail Therapy

如果話買嘢係一種治療 (Retail Therapy), 幫助減低壓力, 咁呢個治療就有好多副作用.

我可能係呢個治療裡面o既一個病人, 同時亦都受到其副作用o既毒害...... 之前我都講過我最怕係服務超好o既sales, 有呢班治療師係度, 我買嘢真係買得好癲. 財散人安落, 可以減去工作上o既壓力, 但另一方面, 財政上o既壓力就增加不少. 

除咗財政上o既壓力, 呢種治療其實係會上癮. 當每一次你買完嘢之後就覺得工作上o既壓力得以消耗, 下一次你就會以同樣o既方法去買嘢.  呢個係一個好正常o既心理現象.  如是者, 每一次都買嘢, 越買越多, 因為單係買一兩樣嘢已經滿足唔到自己. 每次用o既錢就會越多.... 難怪市面上有咁多以清咭數為名o既借貸.

肥, 亦都係我o既一個自動反應 (automism) 去買更多嘢.  因為肥咗好多, 唔好話好似陳奕迅首King Kong 個mv 入面d好仔咁, 就算係而家我肥到肥過肥杏d都已經夠難買衫, 因為有大size o既店舖唔多, 好似ozoc, indivi 等一律日本牌子我就諗都唔洗諗 (而我去日本都冇可能會買到衫!!!), 最靚最抵著叫做Zara, 有時响Marks & Spencer 都可以搵到好嘢, 唔.... 間唔中一至兩件, 仲要加工. 最近我就睇中咗Kookai, 而有一個非常之好o既治療師响度, 幫我揀到好多靚衫, 著咗又睇落ok slim, 豬腩肉都收埋哂.如是者, 每次不惜一擲千金係咁買...... 結果......

以上係一個Shopaholic o既理性o既自白, 不過我已經病入膏肓, 不能自已..........