第一課ー私は湯です。

雖然話, 日文係可以自學, 但係見肥仔林呢排咁忙 (而foreseeable future 都會係), 而我o既青衣生涯就因為得番一個半月而被投閒置散, 所以我都係報讀咗中大o既專業進修課程o既一個cert course, 横掂都係, 梗係讀cert course 啦. 

其實已經上咗四堂, 嘩, 五十音都學哂, 琴日終於開始教第一課.  好緊張~!! 由於呢個係一個暑期超密集的課程, 一個星期上三堂, 每堂6:30 至9:30, 所以我已經冇咩休息時間, 返到屋企都要做功課同溫習, 因為每一堂都有默書, 下個星期仲有小測, 好幾harsh, 好彩我有的是時間... 

可能因為我之前自己都叫學過吓本"みなの日本語", 所以我pick up 呢個language 覺得唔太難, 其實諗番之前我自己都有苦練過點樣記住呢五十音, 所以都好明白一d完全冇接觸過日文o既同學, 又真係會幾痛苦.  如果我當初自己冇讀過, 我諗我都會好似其他冇讀過o既同學一樣覺得超harsh.

琴日終於先生教咗我哋各位同學o既姓氏點讀喇.  由於我之前去過日本, 明白我個姓"湯" 响日本係解熱水或者係溫泉. 睇過"千與千尋",裡面o既湯婆婆係讀成"ゆばば" (yubaba). 又見過嗰d 响個溫泉館或者係澡堂出面有一塊門布好大隻字寫住"湯" 或者係 "ゆ". 所以我一路都以為自己個姓係讀"ゆ".

琴日先生話, 我個姓係讀"トー" (to--), 唔係好鐘意呀~!! 梗係覺得好果係"ゆ"就型好多囉!! 雖然"ゆ" 係幾好笑!! 不過中文o既"湯"字又何嘗唔係俾人由細笑到大呢??

こんにちわ。私は湯です。はじめまして、どうぞよろしく。おがけさまで、元気ですね。