可憐貓被強烈遣責

我阿爸係一個何等知慳識儉o既人, 難聽d叫"孤寒".  今個星期初, 我老頭終於都會一個傢俬展度買咗一張黑色皮梳化, 成為$8000 大元.  點解我話終於? 因為我老頭由我只係得幾歲o既時候已經開始睇梳化, 我仲記得以前住响海港城o既時候(係咪唔知道海港城係可以住人呢? 以前仲未有港威嗰面, 成廿年前,海港城係一個屋苑嚟o架!!!), 差唔多每個星期我同阿爸都會去响海港城商場裡面o既歐化傢俬睇梳化.  唔經唔覺, 睇咗都有廿幾年, 到到今個星期, 終於都响屋企發現咗一張等咗廿幾年o既梳化, 一張黑色o既真皮梳化... 佢同我屋企全屋深棕色o既裝潢一d都唔襯, 古古怪怪咁屹立响廳o既正中央, 隔離仲有兩張中國式o既桃木椅, 茶几, 櫃, 餐台...... 而呢一張梳化, 雖然係古怪, 不過不得不提佢真係幾舒服, 尤其佢有一邊係一個長型o既坐墊, 可以俾人靠住個梳化背, 然後伸直對腳咁坐响度(當然係睇電視啦), 呢個位亦都成為我阿爸o既最愛.  只不過係响度幾日, 我每朝出門口, 都見到阿爸坐响張梳化睇報紙, 返到屋企, 佢又會响度睇電視(佢間房都有電視, 仲要有多d台), 可見佢有幾鐘意呢長梳化.

話說星期四嗰日, 阿爸同阿媽一齊去澳門珠海玩. 由於佢哋應該响中午o既時候出發, 印傭小姐又返咗鄉下, 所以屋企只係得返兩隻貓响屋企.  當日我已經响搭正5:30即係走人, 唔係怕d貓會反轉間屋, 只不過係我屋企兩隻貓都係5點鐘食晚飯, 怕餓親佢哋啫.  當日我阿哥都好早返到屋企, 又係叫做陪吓d貓咁啦... (養寵物? 定係我哋先係寵物???)

當貓同我都食完晚飯(當然貓係6點幾食,我係食8點幾), 我响房度打機(仲打緊PS2, 係咪好out 呢??), 阿哥就响廳度坐响新買唔夠5日o既梳化上睇電視&報紙&聽收音機(!!), 突然佢發現梳化中間o既坐墊上有好幾細孔, 仲有幾條抓痕, 然後再睇左面o既手枕上面又有幾個凸出嚟o既細孔, 再檢查落去,弊, 連右邊嗰張長坐墊上面, 同埋右邊個手枕都有...... 好明顯係貓抓造成o既損壞.........

又到咗貓貓貓誰是凶手o既時候, 究竟係肥肥蠢蠢o既麥兜, 定係大奸大惡o既mimi 做o既呢??當然, 貓磨爪係生理需要, 咩性格o既貓都要磨爪o既.... 我捉住麥兜隻手, 發現佢d爪係"掘"o既,但係隻後腳o既爪就有少少尖, 所以都唔可以排除佢o既嫌疑... 至於mimi, 佢咁惡, 就唔洗旨意睇到佢d爪啦.....

普通法o既刑法係疑點歸於被告, 但係湯家法呢???似乎似有殺錯冇放過!!於是兩隻貓都同樣地被阿哥家姐佢哋恐嚇,當然, 當阿爸番嚟時受到嚴厲o既遣責......

我作為麥兜主人, 當然要保住自己個仔仔, 但係麥兜又冇話俾我知佢唔係凶手, 我只好死撐咁幫佢...... 無奈佢最愛都係阿媽, 今朝我要佢唔好走入阿爸房, 唔好去送死, 佢係都要入去... 我諗佢有佢自己o既方法叫阿爸唔好嬲佢囉.....!!

(後記: 我琴日去咗寵物店度買咗一支貓貓禁區噴霧, 個原理係放出一d臭味令貓貓唔鐘意所以唔會過去.  好失策地我只係返到屋企先聞吓... 直頭臭到連我都唔想過去啦!! 唔好玩啦~~~!!)