想當年: 港大舍堂生活

呢幾日都好忙, 忙到都冇時間blog.  唯有而家又襯自己冇咩心機做嘢, 寫吓先...

星期二有一個交通o既審訊, 等咗一朝先開始.  所以成個星期二朝早都坐咗响個court canteen 度, 傾case 都冇咁多嘢講啦, 同個客吹吹水.  佢係一個港大o既學生, 佢女朋友都係, 一個year 3, 一個year 2.  佢哋有時都恩愛到un-頂-able, 兩小無猜, 好可愛, 可愛到有d旁若無人... 我同個大狀就响度扮睇唔到, 唉吔...

星期一開始我又同Meggy 小姐返咗何東幫手drama.  interhall 响星期日就係, 但係宜家仲係咁... 無眼睇, 但係唔理又好冇義氣, 尤其我知道meggy 唔係志在我幫手, 只係想我陪吓佢咁啦, 於是出於好心, 出於心軟, 出於義氣... 呢個禮拜挨眼瞓sai錢都要返hall... 到半夜先飛的士返屋企... 生性d啦......

由於以上兩件事, 令我諗番起好多前幾年讀港大o既事...

就係响港大o既法律系, 識咗我個男朋友. 識佢嗰時, 我係year 1, 佢係year 2.  其實真係覺得佢好悶, 我仲記得第一次同佢單獨食lunch, 係响高街/水街一間台灣食店, 佢係咁講大學學生會d嘢, 我其實嗰餐飯我真係好悶, 我到宜家都係咁覺得,本來唔係好鐘意佢, 但係點知就係一個假o既擁抱通咗電..... 之後就出現咗一個七國咁亂o既關係圖表..... 我覺得我响year 1 同year 2 o既時候係最靚o既時候 (雖然都唔稱得上係靚...... ) 宜家... 算罷啦......

year 2 o既時候, 我入咗何東夫人紀念堂, 港大o既其中一間傳統舍堂, 所以都有維持住港大所有o既hall education.  過orientation 嗰十日, 長到好似成個月咁, 可能係因為不眠不休啦. 嗰幾日天氣又唔好, 好似有打過風. 仲有出過街淋過雨.  有好多人覺得佢哋無權要我哋咁...... 入咗hall, 第一年係係人蝦, 不過我硬朗o既性格好快就傳遍各人, 有d team 好似覺得我唔好, 我冇理, 我只係做我喜歡o既事, drama 同choir.  後尾响year 3 做埋choir o既team captain, 加埋讀書o既壓力, 我終於病咗, 要返屋企住, 但係同一時間又要番去練choir 同drama...... pcll 嗰年又係咁..... 好辛苦, 但係我係好enjoy 個過程.  唔係因為全部人會以為你好勁, 又或者自己好似好偉大咁... 只係, 當你喜歡做呢一件事, 好投入咁做, 有幾辛苦, 好幾多唔開心, 都唔會介意.

我記得year 2嗰年做o既drama, 我只不過係一個小小o既配角都唔係o既演員, 而meggy 係team captain.  我哋兩個早就响中學時一齊玩drama, 佢係好有drama sense o既, skill 就經琢磨後變得非常好啦.  當年個劇係講理想同夢想, 主角個理想, 未必係自己想o既, 屋企人想啦... 就係要做一個律師, 但係夜晚, 佢就去舞廳唱歌.  當年我都叫做有份諗個劇o既, 結果? 想起自己讀書讀得唔好, 覺得自己唔鐘意法律, 諗呀諗, 我鐘意d咩? 酒管, event planner, wedding planner... 我真係有考過poly 酒管, 但係冥冥中都係唔可以實現. 結果, 我就係讀咗pcll, 就係做咗一個trainee.

meggy 係一個好好朋友, 我同佢合作o既機會多, 但係真係見面食飯又小喎. 佢讀過演藝, 人又靚, 呢, 早幾日佢同我講某間5星酒店請咗佢去做event planner... 唉... 似乎我想做o既事佢就做哂, 我好妒忌, 或者條命生成就係咁啦...

我呢? 似乎冥冥中又係注定咗, 我想做戲, 但係最後只係一個睇完戲會响個網上吹多幾句水o既人; 想做酒管, 我諗我多數第日都係响酒店食吓嘢之後又响網上發吓up瘋啦!!!