12-12-09 @ 王子照X光

  本來王子係8號果日同格格拆線去照X光,但係因為王子食咗早餐,所以唔照得~

  到11號晚就等王子食完晚餐就唔可以再食..

  12號一早就唔俾水王子飲, 上午11點半就出門口,去到診所勁多人..等咗個半鐘先見到Dr.Tint.. 佢幫王子檢查吓,反正要麻醉,我哋就叫醫生順便照埋手..打完鎮靜劑就抱王子入去,話大約六點零就可以接佢走~

   其實我哋都有心理準備王子係會有d問題..六點去到診所,之後入去睇X光片,Dr.Tint解釋得好長細,仲照咗好多張片添..醫生講果陣,我已經死忍難忍唔喊,直至到抱王子出嚟果刻,我見到王子果樣好吽哣,我就忍唔住流眼淚.. 再忍忍..聽完醫生講完,又係要打四支針,每星期一支.. 之後我見王子想去廁所嘅樣,就拖佢出門口行.. 等子爸俾錢同約時間打針..埋單$2500~

  諗住行番屋企,行咗陣見王子越嚟越攰,我哋就搭的士返屋企~ 由診所到返屋企,我哋都無出過聲.. 返到屋企幫王子抹乾淨腳就抱佢坐梳化,費事格格撩佢玩~ 我抱起王子挨落我度瞓,佢真係好吽.. 我用手機上FB話俾朋友知已經接咗王子回家.. 唔夠五分鐘,蕉媽就打比我,我叫子爸聽,因為我唔想講嘢..跟住P ma打子爸電話,我惟有聽,但我又忍唔住喊.. 子爸同蕉媽講完,我叫佢打番比P ma, 點知到大奶打嚟,佢又一定要我聽,佢安慰我.. 但其實我唔想講嘢,我怕我一開口又喊.. 我明白你哋講嘅嘢,我只係心情唔好,我喊完就無事,你哋放心啦~

  多謝你哋打比我安慰同問候王子,多謝你哋關心! 亦多謝狐媽一睇到FB訊息即刻打比我! Thanks so much!

   其實我好內疚同自責.. 我未搬屋前住嘅地方好細,無活動空間..果陣王子六七個月大仲好細個,我知佢唔會喺我哋面前屙尿同亂咬嘢,所以我好放心佢喺屋裡面自由行.. 係我抱佢上床瞓,係我成日借d意俾佢跳上床.. 結果佢學識跳而我亦無阻止.. 全部係我錯!!

   到我搬咗來之後,開頭都有跳吓床同梳化,直至朋友講唔好跳咁多,加上早三四個月前佢整傷過隻腳,已經無再俾佢跳上床,加上用圍欄欄住唔俾佢跳梳化..希望未算遲..佢唔好惡化..我哋仲可以補救啦..

  我嘅一對寶貝王子格格,對唔住,你哋唔好有事呀..我會盡我能力去保護你哋,令你哋兩兄妹健康快樂!