豬流感

中招了，中招了！



不過唔係我，
而係我做既住宅有個客早幾星期中招捉o左入醫院隔離，
上晝入院，下晝衛生署就通知我地話我地棟大廈有一單確診個案，
即刻要出通告、逐家逐戶打電話通知、
又要約清潔判頭拉大隊成棟大廈清潔、
全世界要戴口罩、定時噴消毒藥水…(下刪九萬幾字)、
關閉住客會所同泳池、關閉戶外兒童遊樂場等等，
真係做到人都癲！

不過比起SARS，D人比較冷靜得多，
或者應該話....輕鬆得多…
收到D客所有關於豬流感o既查詢電話都係問一個問題…
「個會所幾時開返呀？」
.......
.......
真係想答佢玩少陣係咪會死！！
可能個病的確無最初預期咁利害，
所以而家各方甚至連政府都對個病既反應開始陸陸逐逐地降溫。
相比起當年沙士時，
最初所有人都唔知咩事，
凈係知中招之後好快就會死，
所有人既反應敏感得多。
就好似你o係沙士爆發期間既繁忙時間搭地鐵，
架車廂點逼都好，
你只需輕輕咳兩聲，
成架車廂即刻變成你既私人包廂，
真係訓o係度都仲得。

最記得沙士時發生過一件趣事，
記憶非常之深，
話說當時我同我朋友o係一條街度行，
迎面有一對年紀好大既公公婆婆，
個婆婆要用拐仗附助，個公公就o係佢側邊扶住佢，
當我地四個人擦身而過o既一刻，
我朋友突然喉嚨痕咳左兩聲，
你估都估唔倒之後我見倒o的乜…
呢對行路又慢又不便o既公公婆婆竟然…
好似武俠粵語長片入面D嘍囉咁手拖手齊齊打側跳開，
一路跳一路用兩對極度驚謊O既眼神望住我地(因為戴晒口罩所以得對眼)，
果一刻我o既感受只能用四個字去形容-----「嘆為觀止！！」

呢排小弟比較忙所以好耐無更新，希望各位多多包函同埋繼續支持！