投訴

相信天下間所有做客戶服務行業o既人，
o係自己o既職業生涯入面一定遇倒過大大小小各式各樣o既投訴，
而以下呢一個投訴係我暫時遇過最特別o既一個…

被投訴o既人唔係我，
而係我o既同事-阿仁，
話說有一日我同阿仁一齊當值會所，
當日下晝突然見佢一臉茫然咁o係女更衣室走出o黎，
(因為好多時都無女同事當值，
所以我地男同事都會入女更衣室check下各樣物品例如洗頭水、沐浴液用晒未、有無設施壞o左之類，
雖然我地男女更衣室外有密碼鎖，
用以每次有住客入去前都會問我地拎密碼先入倒去，
從而記錄低有咩人入左去，
正常黎講我地一望份記錄表就知入面仲有無人，
但係好不幸總有D"好心"住客一個密碼通街派，
所以每次入去前都會喊驚咁嗌「有無人呀？」一輪，
確認真係無人先入去。)
我見咁o既情況梗係問阿仁咩事啦，
以下係我地既對話內容...
我：「做咩呀？」
仁：「頭先我諗住入女更refill洗頭水，一時心急無嗌有無人就撞o左入去，點知…」
我：「入面有人？」
仁：「係呀…」
我：「咁有無著衫先？」
仁：「就係咩都無呀！」
我：「唔係呀化…？入面邊個o黎o架？」
仁：「阿X太同佢朋友囉…」
我：「咁你一定俾佢投訴都得勒！」
仁：「唉…死啦！都唔知點算！」
我：「仲可以點呀？企定定o係度等佢出o黎道歉啦！」

如是者，十數分鐘過後，年約四十歲o既阿X太同佢朋友終於由女更衣室走出o黎，
正當我同阿仁企定定準備迎接兩個玄檀咁既黑面神過o黎投訴之際，
抬頭一望，阿X太同佢朋友兩個人竟然一D都無黑面，
甚至應該用春風滿面去形容…
阿仁當然有理無理猛咁道歉啦！
點知阿X太竟然如沐春風、容光煥發、笑吟吟咁講：「哎唷，下次入o黎之前小心D丫嘛。」
跟住就走o左去…
雖然阿仁都尚算高大兼靚仔，
但係真係估唔倒阿X太同佢朋友會咁o既反應，
果刻俾我個感覺係阿仁先係洩底果一個…
阿X太同個朋友一出o左門口我就已經忍唔住踎低o係counter底笑到失聲…

以上個案全部屬實，如有雷同實屬極度不幸！