入行後的怪異事件簿(四) 之 電梯頂有人!?

話說又有一晚o係之前成條走廊熄晒燈o既商廈(詳見 : 入行後的怪異事件簿(二) )當夜更，
當時係零晨時份，
成棟樓o既人已經走得八八九九，
而我又夠鐘要去巡樓，
差不多所有地方巡樓都係由頂樓開始巡落地下，
(因為近年太多新樓樓底高而且層數多至四、五十、甚至過百層，
一次過由頂樓巡到落地下兼夾日日最少行一次，
長期咁行法應該命都無！
所以有D地方會將一棟大廈分成幾截咁去行，
每次只需要行其中一節。)
所以我又搭電梯上頂樓開始巡樓。

我拎住支巡邏棒(#註一)入電梯，
按完三十二樓(頂樓)之後電梯門慢慢咁關上，
o係部好寧靜o既電梯入面睇住個樓層顯示屏一層、一層咁數緊上去，
數到約莫廿幾樓左右，
突然聽倒電梯頂…









有人o係度吹口哨!!!!!!!!




果一刻全身毛管豎起晒!!
比著o係其它地方一早就走o左啦，
但係o係部行緊o既電梯入面你叫我走去邊!?!?
所以唯有強裝鎮定咁繼續等部電梯去到頂樓…
我一路扮鎮定，頭頂o係口哨聲就繼續吹唔停，
短短十秒時間就好似十年咁耐，
電梯卒之去到期待已久o既頂樓，
口哨聲亦o係到頂樓之前停o左落o黎，
電梯門一打開我第一時間一支箭咁標出去…繼續巡樓，
一路巡一路驚，但係果一晚一直咩事都無，
而我亦無同其他人講起呢件事。

之後果一日我係放假，
放完假我就轉返日更，
返日更食晏時我好鍾意同負責呢棟商廈保養電梯o既師傅一齊食，
一路食一路傾，
講o下講o下我忍唔住問....
「賓哥，有無試過聽倒部lift有咩怪聲呀？」
『怪聲？咩怪聲呀？』
「例如機頂有D怪聲咁呢…」
『怪聲……？(思考中)………哦！有呀！你講緊D口哨聲丫嘛！』(！？)
「咦？你都有聽過呀？」
『係呀！最初聽倒無啦啦機頂(電梯頂)有口哨聲，
跟住去機房(電梯機房)搵o下D聲邊度o黎，
原來D聲係機房度門俾風吹到VEE VEE聲，
十足十有人吹口哨咁，唔知真係嚇鬼死呀！』
「!@#$%^&*！！ 嚇得我丫！」

結果又係一個自己嚇自己o既故事…


(註一 : 用途係讀取裝晒o係大廈不同地方既電子鈕，記低你何年何何時何刻行過咩地方。而家大部份大廈都係用呢種巡邏棒取代舊式扭匙式巡邏鐘或者簽到簿。)