更衣室

而家大部份o既新屋苑都一定有一個住客會所，
通常住客會所都會有沖涼o既設備(更衣室)，
通常入面會有埋桑拿、steam、jacuzzi等等，
但係若果呢類設施係唔需要收錢o既話，
咁就真係惡夢o既開始…。

若果你住緊o既地方有上面呢類形o既設施兼且係免費o既話，
晚飯後落去會所望下，
你好有可能會見倒更衣室出現人頭湧湧o既情況，
但係使用完需要沖涼o既設備就鬼影都無隻(例如泳池、健身室)，
點解呢？
因為入面有一班為o左慳盡駛費o既尊貴住客，
屋企有涼唔沖有水唔用，
晚晚一家大細一身沐浴裝束走晒落去會所沖涼囉！

呢班慳家達人無所不用其極，
好多都係你估都估唔到的，
呢類尊貴住客，
通常晚晚食完飯就著住睡衣一家大細連埋工人輪住咁走落去會所沖個靚涼，
晚晚如是；
更甚者就係連衫、褲、內衣、底褲、襪，統統都即場洗埋，
然後就攤晒o係梳妝檯面自顧自咁用個俾人吹頭o既風筒起勢咁吹吹到乾為止；
再落黎呢種更加係慳家達人王，
沖涼前已經見佢拎住一個手抽袋好輕鬆咁走入人頭湧湧o既男更衣室，
到沖完涼出o黎時，佢已經係最後一個，
佢拎住果一袋本身輕飄飄但係而家已經重到膊頭都側晒咁行，
見倒時已經有多少唔對路，但係又奈佢唔何，
直到會所o既清潔阿姐講o左句說話我即刻如夢初醒！
會所阿姐話：「兩個鐘頭前我先至入滿晒男更(男更衣室，但係我地多數就咁叫"男更")全部咁多格o既梘液、洗頭水同護髮素，但係依家又無晒喇！」，
一聽完即刻標入去男更check o下，
果然全部一滴不剩！
通常入完一次大約用倒兩至四晚，
你話呢位慳家達人王幾咁物盡其用兼知慳識儉呢

但係呢班知慳識儉o既慳家達人經常惹o黎一班正常使用會所o既客投訴，
我地好自然就夾o係兩幫人o既中間成為磨芯…
一邊就不停投訴：「點解D人成人唔係游水健身，但係晚晚走落o黎沖涼？
你知唔知D洗頭水我地都有份o係管理費度俾o架？！」

相反另一邊就更加利害，你客客氣氣同佢講，佢真係睬你有味！
你講多幾次佢又撻一句：「我無錢俾管理費咩！？ !@#$%^&」

所以若果閣下屋企有呢類形o既「慳家達人」甚至連你都係的話，
回頭是岸呀......