看更

小弟入o左呢行不驚不覺已經七年，
首先講講自己既職位先，
我既職位名稱係大廈管理員，即係俗稱既「看更」，
仲記得當初入行時，
身邊既同學、朋友知道自己做呢行時，
總會冷嘲熱諷一番，
例如一齊行街食飯，
路過見倒商場一把年紀o既保安，
(當年各大小商場普遍以上o左年紀既人做，唔似今時今日各大小商場以年輕職員掛帥。)
一定會o係側邊講：「喂！你o的行家呀！」
然後用一幅十足十粵語長片入面d奸妃既招牌式陰陰嘴笑一輪，
真係聽倒就想走埋去「行家」度借碌矮瓜(警棍)黎辦埋去band佢個嘴！

而親朋戚友知道自己做呢行時，
又會乘機「關心」下：「做咩咁後生做呢行呀??」、「咁後生做呢行屣晒啵！」、「做呢行無前途呀！」、bilibala一大輪，真係夠命…
當年我入行時十八歲，可能連睇緊既你都會覺得上面o的親戚講o既說話講得好o岩，
之但係，若果話俾你知，o係呢行學倒既野終生受用，
而且係其他行業你未必學得到，你又相唔相信?

相信大家都知道，「看更」大部份都係由上o左年紀o既阿伯去做，
好少後生仔會做，亦從來不在搵工考慮之列，
老實講，入行前我都唔會，好人好者做乜要走去做看更??
而我係失業一年左右，經親戚介紹入行，結果一入行就做左七年。
入行後，因為做過好幾個地方，身邊拍檔有如走馬燈，轉公司、轉行、退休等等，
一齊拍檔過既人大大話話真係有百幾二百人，
因為身邊既拍檔大部份都係上o左年紀既人，
大家返工、食飯時都會傾o下閒偈過日辰，
傾談之間除左會學倒工作方面既知識外，
亦好容易傾到對方o既陳年往事，
慢慢從傾談之間，吸收到好多好多人生o既歷練，
呢d都係其他行業未必會學到既知識。

唔講大家可能唔知，其實呢行既人真係臥虎藏龍，
入行前既身份好多係你諗都無諗過，
聽得最多既係大陸開工廠甚至幾間廠既老闆因生意失敗而入行、
有退休o既警察、有華籍英兵、

有隱形富豪o既第二代，因為爸爸被幾個拍檔夾埋呃晒公司所有錢監生激死o既淪落富家子弟、

有退休既某某高級酒店經理，積蓄絕對夠食過世，但係因為抵不住個「悶」字而入行、

有江湖叔父輩人馬又係因為「悶」字走o黎陪老友返工，
而且夠膽死三日唔埋五日打返公司話自己頂唔順，
真係唔夠人先叫佢開工(當時份工係日薪計o既)，
但係放工時候你又會見倒佢一身黑色西裝渣住架好辣o既跑車o係樓盤門口車佢o既老友去happy hour…、

有屋企絕對唔憂柴憂米，但係因為唔想繼承家族生意，離家出走過住自給自足生活o既中年人、

更有個因為某次夜晚o係寫字樓影印稅單後唔記得拎走正本而被發現交稅款額高於我一年年薪有多既平時對客人對同事都極為謙恭有禮o既中年人…、

而其他大部份都係以前香港魚翅撈飯o既年代身家數百萬甚至數千萬，因為金融風暴而家財散盡既失意人，

所以，你屋企樓下個「看更」其實隨時曾經經歷過你聽完會目定口呆o既日子。