邊度都冇得去！

考完試啦！終於都考完試啦！

好多人都問我考成點，等我講番比大家知先。

唔知係咪打錯氣or 加錯油，當日一早七點起身，七點半去坐巴士，但個腦一直都係空空地﹝其實係兇兇地﹞，到坐底攞住支筆時，基本上係咩都唔記得，只係記得自己要呼吸！唉！希望可以大步檻過啦！

係度多謝各界朋友及blog友的關心，多謝在我沒有寫blog的日子內，也來探探我呀！對上一篇blog，係歷史性有20個回覆，多謝，我要再一次多謝大家至得啦！

考完試，好正常，除左帶發財去玩之餘，連自己都想去玩下，所以我又打開報紙睇下d旅行團，本來好想去d體驗團，即係果d好辛苦得個行字，但係d景係靚到嘩嘩聲果d，所以應該係去張家界或考尼泊爾之類。係睇團之餘，我亦睇睇外門必需品，就係護照同回鄉証。

哈！唔睇就出事，一睇就大件事，原來我本BNO同回鄉証分別係2005年4月同2008年4月到晒期，而家只係番晒張身份証冇到期，咁即係話，我而家邊度都唔洗去，只可以留係香港啦！﹝亦暗示，其實我有好多年冇離開過香港！﹞

Oh............No!!!!!!!!!

真係唔明，點解香港每日都有咁多人去申請護照，係每一日都係咁多人，因為我係網上預約度睇，真係差唔多要早一星期至十日前預約，仲要係office hours內，咁點搞呀！唔洗做咩！咁都冇計，我拿拿臨係星期六一早走去最多街証籌的元朗入境處同中旅社度，睇下有冇可能攞到街証籌，好可惜，都係攞唔到籌，所以特區護照唯有做投遞，同埋番屋企上網預約申請回鄉咭。

我，而家邊度都唔洗去啦！只可以留係香港，直至五月。到左五月，我就可以去…日本啦！﹝你可能會問，點解會由體驗團變左去日本？原因好簡單，因為我唔記得左，原來我咁大個人，仲未去過日本架！所以…﹞

Yeah!!!

Yeah!!!

Yeah!!!