真係得番我一個！

數數手指，小仙其實打工都打左超過十年，離職呢d 嘢，真係見得好多，但今次我係面對我同事離職呢件事上，感覺有點奇怪，真係有點依依不捨！

昨天係我公司個同事的last day，因為佢有新公司請左，所以佢要求提早兩個星期離開。初時我真係有d嬲佢，覺得佢好自私，係我大肚嘅時候至嚟走，等我想安心放產假呢個諗法突然出現在暗湧，但最嬲就係老闆，佢話唔諗住請番個人嚟做佢個位，咁即係佢大部份嘅工作都會比左我做，我為左呢樣嘢，真係煩左好耐，但冇計，我而家又唔走得，唯有頂硬上！

不過自己冷靜落嚟再諗真d，工作呢家嘢，冇得話邊個自唔自私，工作係自己架嘛，而且我個同事係我公司呢份工係第一份工，一打就已經打左四年半，真係係時候要出去睇下個世界，所以，好快我都shift 左個情緒，公司嘢到時至算啦，咁始終我同佢做同事真係做得幾開心，我同佢都係冇咩所謂，好多時我遲到早退佢都會幫我，而且，公司好多時都係得我地兩個，感覺就好似兩個相依唯命的人，唔知係咪因為咁，感情好似兩姐妹咁！當然啦，佢都有d 地方唔係咁好，而我都係！

昨天，公司一齊出去食lunch，當係farewell lunch，之後佢又send email比公司同事，話好多謝呢四年嚟的幫助。我都有回番佢話：多謝番佢話呢幾年間大家工作得好開心，如果有得揀，我真係唔想佢走，但明白始終都要出去闖下，所以我會祝福佢！老實，我好少會咁同佢講嘢，因為做嘢唔應該放太多私人感情係裡面，但係，都最後一日啦，冇所謂啦！我見到佢眼紅紅，我問佢係咪唔捨得，佢話佢其實都唔捨得走，但係冇辦法，再唔走，怕之後會再搵唔到工。我明白的，呢間公司又唔係真係好好，只是工作上比較自由，老闆又冇咩脾氣，但人工就唔好諗得太多。

到放工，諗住等埋一齊走，我知佢真係好唔想走，因為佢呢度整下果度睇下，佢差唔多搞到成八點至走，佢話我今日係最遲走的一日喎，我話：係呀，準時收工好員工嘛！最後，我同佢影左張相，作為一個留念啦！

我返到屋企，個心仍然係戚戚然，不停想起呢幾年間一齊工作的時候，想起見工的時候，第一日返工的時候等等，又諗起，我地成日都想去試果幾餐廳都未試到，我係度諗，我呢幾年嚟，究竟有冇好好咁珍惜同佢一齊的時間呢？好似有但有好似未盡力咁。點解我呢一刻個心情會係咁？我好似失去左一d嘢咁！我想像唔到之後返工d 時間會係點！我驚我以後返工d 時間好似自閉咁，一個人冇機會講嘢，之後會唔會唔記得左點講嘢架？

希望老闆快d 請番個人番嚟啦！