新生活

尋日，大舅父突然打嚟話買了石斑龍躉去孖仔舅父屋企，叫我同老豆過去食飯，哈哈，老豆唔想出街，我當然找藉口唔去啦，事關平日收得夜，無理由放假留佢一個人食飯；二來我好怕見到孖仔舅父，大家唔好誤會我討厭佢，其實我係逃避佢先真。

幾年前舅父做了大手術，身體的問題令佢住了年幾兩年醫院，自此之後整個人變了，可能做唔到野，成日亂諗野，唔出聲唔出街，我知道佢好鐘意見到我地班後生，但另一方面又會覺得自己好無用。日子來了，他的情況依舊，而我又幫唔到佢，見到佢心都痛埋，唔見佢又擔心掛住佢，雖然大家住在附近，但我地真係好少見面，幸好舅母明白體諒我，從無怪我。

舅母尋日都有打電話比我傾下近況，原來舅父已開始返工，可惜好多野做唔到，只能返通宵間的保安，仲要去落馬洲咁遠，其實咁都好，希望舅父慢慢適應新的開始，新的生活。